Kerala Travels Kerala Classifieds Kerala Index Kerala Education Yellowpages Kerala Hotels Kerala Tourism Kerala Jobs Kerala Homestays
Kerala.com-Kerala Events-Kerala News- Kerala Realestate-Kerala Travels
Kerala, Kerala tourism, Kerala travels, Kerala hotels
Malayala Manorama  |   Mangalam   |   Madhyamam   |   Mathrubhumi   |   Deepika   |   Metro Vaartha   |   Kerala Kaumudi   |   Deshabhimani   |   K Vartha   |   Webdunia   |   Marunadan Malayaly   |   One India
 
Malayalam News
ദോഹ: അവധിയാഘോഷിക്കാനായി സ്വദേശങ്ങളിലേക്ക് മടങ്ങുന്ന പ്രവാസി ഇന്ത്യക്കാരുടെ തിരക്ക് കണക്കിലെടുത്ത് ദോഹയിൽ നിന്ന് കേരളത്തിലേക്ക് കൂടുതൽ വിമാനങ്ങൾ അനുവദിച്ചതായി ഇന്ത്യൻ വ്യോമയാന മന്ത്രാലയം അറിയിച്ചു. ദോഹയിൽനിന്ന് തിരുവനന്തപുരം, കൊച്ചി എന്നിവിടങ്ങളിലേക്കാണ് ഈദുൽ ഫിത്തർ ദിനമായ ശനിയാഴ്ച മുതൽ ജൂലൈ എട്ട് വരെ എയർ ഇന്ത്യയുടെ കൂടുതൽ വിമാനങ്ങൾ അനുവദിച്ചിരിക്കുന്നത്. ഇതിനാവശ്യമായ നടപടികൾ സ്വീകരിച്ചതായും മന്ത്രാലയം വ്യക്തമാക്കി. ഖത്തറിന് മേൽ യു.എ.ഇ. ഉൾപ്പെടെയുള്ള രാജ്യങ്ങൾ ഉപരോധം ഏർപ്പെടുത്തിയ സാഹചര്യത്തിൽ യു.എ.ഇ. വഴി ഇന്ത്യയിലേക്കുള്ള യാത്ര ഭൂരിഭാഗം പേരും റദ്ദാക്കിയിരുന്നു. ഈ സാഹചര്യത്തിൽ നിലവിലെ ദോഹയിൽ നിന്നുള്ള വിമാനങ്ങളിൽ തിരക്ക് അനിയന്ത്രിതമാകുമെന്നതിനെ തുടർന്നാണ് പുതിയ നടപടി. രാജ്യത്തെ 27 ലക്ഷം വരുന്ന ജനസംഖ്യയിൽ ആറ് ലക്ഷത്തോളം ഇന്ത്യക്കാരാണ്. ഇതിൽ മൂന്ന് ലക്ഷത്തോളം മലയാളികളും. വ്യാഴാഴ്ച സ്കൂൾ അവധി കൂടി തുടങ്ങുന്നതോടെ നാട്ടിലേക്ക് തിരിക്കുന്ന പ്രവാസികളുടെ എണ്ണം പ്രതിദിനം 800നും 1,500നും ഇടയിലാണ്. അതുകൊണ്ട് തന്നെ നിലവിലെ സാഹചര്യം പരിഗണിച്ച് അധിക വിമാനങ്ങൾ അനുവദിക്കണമെന്ന് പ്രവാസി അസോസിയേഷൻ പ്രതിനിധികൾ ഇന്ത്യൻ സ്ഥാനപതി പി. കുമരന്റെ ശ്രദ്ധയിൽപ്പെടുത്തിയിരുന്നു. പ്രവാസികളുടെ ആവശ്യം സ്ഥാനപതി വിദേശകാര്യമന്ത്രി സുഷമാ സ്വരാജിനെ അറിയിച്ചിരുന്നു. സിവിൽ വ്യോമയാന മന്ത്രി അശോക് ഗജപതിയുമായി സുഷമ സ്വരാജ് നടത്തിയ ചർച്ചയെ തുടർന്നാണ് നടപടികൾ വേഗത്തിലായത്. 186 യാത്രക്കാരെ വീതം ഉൾക്കൊള്ളാൻ കഴിയുന്ന വിമാനങ്ങളാണ് സർവീസ് നടത്തുന്നത്. കൊച്ചിയിൽനിന്ന് തിരുവനന്തപുരത്തേക്കും സർവീസ് നടത്തും. പതിവിന് വിപരീതമായി ഇത്തവണ കേന്ദ്രസർക്കാരിന്റെ വേഗത്തിലുള്ള നടപടി പ്രവാസികൾക്ക് ഏറെ ആശ്വാസമാകുമെന്നതിൽ സംശയമില്ല.
സതാംപ്റ്റൺ: ദക്ഷിണാഫ്രിക്കയ്ക്കെതിരായ ആദ്യ ടിട്വന്റിയിൽ ഇംഗ്ലണ്ടിന് മികച്ച വിജയം. ദക്ഷിണാഫ്രിക്ക മുന്നോട്ടുവെച്ച 143 വിജയലക്ഷ്യം പിന്തുടർന്ന ഇംഗ്ലണ്ട് 33 പന്ത് ബാക്കി നിൽക്കെ ഒരു വിക്കറ്റ് നഷ്ടത്തിൽ ലക്ഷ്യം കണ്ടു. 35 പന്തിൽ പുറത്താകാതെ 60 റൺസ് നേടിയ ബെയർസ്റ്റോയാണ് ഇംഗ്ലണ്ടിന്റെ വിജയശിൽപ്പി. ജേസൺ റോയും(28), അലക്സ് ഹെയിൽസും ചേർന്ന് ആദ്യ വിക്കറ്റിൽ ഇംഗ്ലണ്ടിന് മികച്ച തുടക്കമാണ് നൽകിയത്. ഇരുവരും വേഗത്തിൽ സ്കോറിങ് മുന്നോട്ടുകൊണ്ടു പോയി. 14 പന്തിൽ 28 റൺസ് നേടിയ ജേസൺ റോയിയെ പുറത്താക്കി ആൻഡിലേ ഫെഹ്ലുക്വാ ദക്ഷണിഫ്രിക്കയ്ക്ക് പ്രതീക്ഷ നൽകി. എന്നാൽ പിന്നീട് ഒത്തുചേർന്ന ബെയർസ്റ്റോയും ഹെയിൽസും ദക്ഷിണാഫ്രിക്കയുടെ ബൗളർമാരെ വെള്ളം കുടിപ്പിച്ചു. ഇരുവരും രണ്ടാം വിക്കറ്റിൽ 98 റൺസിന്റെ കൂട്ടുകെട്ടാണുണ്ടാക്കിയത്. ഹെയിൽസ് 38 പന്തിൽ പുറത്താകാതെ 47 റൺസ് നേടി. ക്യാപ്റ്റൻ എബി ഡിവില്ലിയേഴ്സും ഫർഹാൻ ബെഹർദീനും ചേർന്നാണ് ദക്ഷിണാഫ്രിക്കയുടെ സ്കോർ 142ലെത്തിച്ചത്. ഇംഗ്ലണ്ട് ബൗളർമാരായ മാർക്ക്വുഡും ഡേവിഡ് വില്ലിയും തകർത്താടിയപ്പോൾ ദക്ഷിണാഫ്രിക്ക 32/3 എന്ന നിലയിലേക്ക് പതിച്ചു. ഡേവിഡ് വില്ലിയുടെ ആദ്യ പന്തിൽ ജെജ സ്മട്സ് പുറത്തായതിന് പിന്നാലെ റീസ ഹെൻഡ്രീക്കസിനെയും ഡേവിഡ് മില്ലറെയും മാർക്ക്വുഡ് പുറത്താക്കി. പിന്നീട് ഡിവില്ലിയേഴ്സും ബെഹർദീനും ചേർന്ന നാലാം വിക്കറ്റ് കൂട്ടുകെട്ട് ദക്ഷിണാഫ്രിക്കയുടെ രക്ഷക്കെത്തുകയായിരുന്നു. 110 റൺസാണ് ഇരുവരും നേടിയത്. ഡിവില്ലിയേഴ്സ് 65ഉം ഫർഹാൻ 64 റൺസും നേടി പുറത്താകാതെ നിന്നു. ഇതോടെ മൂന്നു ടിട്വന്റിയടങ്ങിയ പരമ്പരയിൽ ഇംഗ്ലണ്ട് 1-0ത്തിന് മുന്നിലെത്തി.
ന്യൂഡൽഹി: അടുത്ത അധ്യയനവർഷം മുതൽ സി.ബി.എസ്.ഇ.യുടെ പത്ത്, പന്ത്രണ്ട് ബോർഡ് പരീക്ഷകൾ ഫെബ്രുവരിയിൽ നടത്തും. പരീക്ഷകൾ ഒരു മാസത്തിനുള്ളിൽ പൂർത്തിയാക്കി ഫലം നേരത്തേ പ്രസിദ്ധീകരിക്കും. നിലവിൽ മാർച്ചിലാണ് ബോർഡ് പരീക്ഷകൾ നടക്കുന്നത്. ഒന്നരമാസത്തോളം നീണ്ടുപോകാറുമുണ്ട്. ഉത്തരക്കടലാസുകളുടെ പരിശോധന കുറ്റമറ്റ രീതിയിലാക്കാനാണ് പരീക്ഷകൾ നേരത്തെയാക്കുന്നത്. ചിലരുടെ ഉത്തരക്കടലാസിൽ ആദ്യ പരിശോധനയിലും പിന്നീട് അപേക്ഷ നൽകി നടത്തിയ പുനഃപരിശോധനയിലും മാർക്കിൽ വലിയ അന്തരം ഉണ്ടാകുന്നതായി ആരോപണങ്ങൾ ഉയർന്നിരുന്നു. ഉത്തരക്കടലാസ് പരിശോധനയുമായി ബന്ധപ്പെട്ട് രണ്ടു സമിതികൾ രൂപവത്കരിക്കാൻ കഴിഞ്ഞദിവസം സി.ബി.എസ്.ഇ. തീരുമാനിച്ചിരുന്നു. നിലവിലെ പരിശോധനാരീതി അപഗ്രഥിച്ച് വേണ്ടമാറ്റങ്ങൾ നിർദേശിക്കാനാണിത്. പുനഃപരിശോധനയുമായി ബന്ധപ്പെട്ട നിലവിലെ രീതിയും സമിതി പഠിക്കും. ഫെബ്രുവരി 15-ഓടെ പരീക്ഷകൾ തുടങ്ങാനായാൽ ഉത്തരക്കടലാസ് പരിശോധനയ്ക്ക് ഗുണനിലവാരമുള്ള അധ്യാപകരെ ലഭിക്കുമെന്നും ഫലം നേരത്തേ പ്രസിദ്ധീകരിക്കാനാവുമെന്നും സി.ബി.എസ്.ഇ. വൃത്തങ്ങൾ പറഞ്ഞു. മാർച്ചിൽ വേനലവധി തുടങ്ങുന്നതിനാൽ കൂടുതൽ അധ്യാപകർ അവധിയിൽ പ്രവേശിക്കും. ഉത്തരക്കടലാസ് പരിശോധനയ്ക്ക് താത്കാലിക അധ്യാപകരെയും കരാർ അധ്യാപകരെയുംകൂടി ആശ്രയിക്കേണ്ട സാഹചര്യമാണ് അതുകാരണം ഉണ്ടാകുന്നത്.
പേരാമ്പ്ര(കോഴിക്കോട്): കൈവശഭൂമിക്ക് നികുതി സ്വീകരിക്കാൻ വില്ലേജ് അധികൃതർ തയ്യാറാവാത്തതിലുള്ള മനഃപ്രയാസത്തിൽ കർഷകൻ വില്ലേജ് ഓഫീസിൽ തൂങ്ങിമരിച്ചു. ചക്കിട്ടപാറ ഗ്രാമപ്പഞ്ചായത്ത് മൂന്നാം വാർഡിലെ കാട്ടിക്കുളം കാവിൽ പുരയിടത്തിൽ ജോയി (57) ആണ് മരിച്ചത്. ബുധനാഴ്ച രാത്രി 9.30-ഓടെയാണ് സംഭവം. ചെമ്പനോട താഴത്ത് അങ്ങാടിയിലുള്ള വില്ലേജ് ഓഫീസ് കെട്ടിടത്തിലാണ് ആത്മഹത്യ ചെയ്തത്. ജോയിയുടെ കൈവശത്തിലുള്ള ഭൂമിക്ക് നികുതി സ്വീകരിക്കാൻ വില്ലേജ് അധികൃതർ തയ്യാറാവുന്നില്ലെന്നാരോപിച്ച് ജോയിയും കുടുംബവും വില്ലേജ് ഓഫീസിനു മുൻപിൽ നേരത്തെ നിരാഹാരസമരം നടത്തിയിരുന്നു. തുടർന്നു കൊയിലാണ്ടി തഹസിൽദാർ ഇടപെടുകയും നികുതിയെടുക്കാൻ നിർദേശം നൽകുകയും ഒരുതവണ നികുതി സ്വീകരിക്കുകയും ചെയ്തു. ഇപ്പോൾ വീണ്ടും ഒന്നര വർഷത്തോളമായി വില്ലേജ് ഓഫീസിൽ നികുതി സ്വീകരിക്കുന്നില്ലെന്നു പറയുന്നു. വില്ലേജ് ഓഫീസിൽ നികുതി അടയ്ക്കാൻ ചെല്ലുമ്പോൾ പുതിയ കാരണങ്ങൾ പറഞ്ഞ് ജോയിയെ മടക്കി അയച്ചിരുന്നുവെന്നും ഇതിലുള്ള മനഃപ്രയാസമാണ് ആത്മഹത്യയിലേക്ക് നയിച്ചതെന്നും ബന്ധുക്കൾ പറയുന്നു. ഭാര്യ: മോളി. മക്കൾ: അമ്പിളി, അഞ്ചു, അമൽ. മൃതദേഹം മാറ്റാനുള്ള പോലീസിന്റെ ശ്രമം പ്രതിഷേധത്തിനിടയാക്കി പേരാമ്പ്ര: തൂങ്ങിമരിച്ച കർഷകന്റെ മൃതദേഹം വില്ലേജ് ഓഫീസിൽ നിന്ന് അഴിച്ചുമാറ്റാനുള്ള പോലീസ് നീക്കം പ്രതിഷേധത്തിനിടയാക്കി.കളക്ടറോ, തഹസിൽദാരോ എത്താതെ മൃതദേഹം അഴിച്ചുമാറ്റാൻ അനുവദിക്കില്ലെന്നു നാട്ടുകാർ നിലപാട് എടുത്തതോടെ പോലീസ് പിൻവാങ്ങി. നികുതി സ്വീകരിക്കാത്തതിൽ മനംനൊന്ത് കർഷകൻ ആത്മഹത്യ ചെയ്യാനിടയാക്കിയ റവന്യൂ അധികൃതരുടെ നടപടിയിൽ പ്രതിഷേധിച്ചു വ്യാഴാഴ്ച ചക്കിട്ടപാറ ഗ്രാമപ്പഞ്ചായത്തിൽ ഹർത്താലിനു കോൺഗ്രസ് ചക്കിട്ടപാറ മണ്ഡലം കമ്മിറ്റി ആഹ്വാനം ചെയ്തു.
കാഠ്മണ്ഡു: ബാബ രാംദേവിന്റെ പതഞ്ജലി ആയുർവേദയുടെ ആറ് ഉത്പന്നങ്ങൾ തിരിച്ചുവിളിക്കാൻ നേപ്പാൾ സർക്കാർ ആവശ്യപ്പെട്ടു. ഗുണനിലവാരമില്ലാത്ത ഉത്പന്നങ്ങളാണ് തിരികെവിളിക്കാൻ നേപ്പാൾ സർക്കാരിന്റെ ആരോഗ്യ വിഭാഗം ആവശ്യപ്പെട്ടിരിക്കുന്നത്. നേപ്പാളിലെ വിവിധ വിൽപനശാലകളിൽനിന്നുള്ള സാമ്പിളുകൾ പരിശോധിച്ചാണ് ഉത്തരാഖണ്ഡിൽ ഉൽപാദിപ്പിച്ച ആറ് ഉത്പന്നങ്ങൾ ഗുണനിലവാരമില്ലാത്തവയാണെന്ന് കണ്ടെത്തിയത്. ഈ മരുന്നുകൾ നേപ്പാളിലെ മെഡിക്കൽ നിയമങ്ങൾ ലംഘിച്ചതായും കണ്ടെത്തി. ഇതിനെ തുടർന്നാണ് പതഞ്ജലിയുടെ നേപ്പാൾ ഘടകത്തോട് ഉത്പന്നങ്ങൾ തിരികെ വിളിക്കാനുള്ള നടപടികൾ സ്വീകരിക്കാൻ ആവശ്യപ്പെട്ടത്. ഇവ ഇനി വിൽക്കാൻ പാടില്ലെന്നും ചികിത്സകർ രോഗികൾക്ക് ഇവ ശുപാർശ ചെയ്യരുതെന്നും ഉത്തരവിൽ വ്യക്തമാക്കുന്നുണ്ട്. പതഞ്ജലിയുടെ അമല ചൂർണം, ദിവ്യഗഷർ ചൂർണം, ബാഹുചി ചൂർണം, ത്രിഫല ചൂർണം, അശ്വഗന്ധ, അദ്വിയ ചൂർണം എന്നിവയാണ് ഗുണനിലവാരമില്ലെന്ന് കണ്ടെത്തിയതിനെ തുടർന്ന് പിൻവലിക്കാൻ ഉത്തരവിട്ടിരിക്കുന്നത്.ബെംഗളൂരുവിൽ നിർമിക്കുന്ന ബക്ടോക്ലേവ് എന്ന ഒരു മരുന്നും പരിശോധനയിൽ ഗുണനിലവാരമില്ലെന്ന് കണ്ടെത്തിയതിനെ തുടർന്ന് നേപ്പാളിലെ വിപണിയിൽനിന്ന് പിൻവലിക്കാൻ ആവശ്യപ്പെട്ടിട്ടുണ്ട്. വിപണിയിലുള്ള പതഞ്ജലിയുടേതടക്കം 40 ശതമാനം ആയുർവേദ ഉൽപന്നങ്ങൾക്കും നിശ്ചിത നിലവാരം ഇല്ലെന്ന് വ്യക്തമാക്കുന്ന വിവരാവകാശ രേഖ അടുത്തിടെ പുറത്തുവന്നിരുന്നു.
റാംപുർ: കൂട്ട ബലാത്സംഗത്തിന് ഇരയായ സ്ത്രീയോട് തനിക്ക് വഴങ്ങിത്തന്നാൽ പ്രതികളെ അറസ്റ്റ് ചെയ്യാമെന്ന് പോലീസ് പറഞ്ഞതായി പരാതി. ഉത്തർപ്രദേശിലെ രാംപുറിലെ ഗഞ്ച് പോലീസ് സ്റ്റേഷനിലെ എസ് ഐയായ ജയ് പ്രകാശ് സിങ്ങിനെതിയെയാണ് സ്ത്രീ പരാതി ഉന്നയിച്ചിരിക്കുന്നത്. 37 വയസുകാരിയായ സ്ത്രീയെ ഈ വർഷം ആദ്യം രണ്ടു പേർ ചേർന്ന് പീഡിപ്പിച്ചിരുന്നു. തുടർന്ന് പരാതിയുമായി പോലീസിനെ സമീപിച്ചു. എന്നാൽ താനുമായി ലൈംഗിക ബന്ധത്തിൽ ഏർപ്പെട്ടാൽ പീഡിപ്പിച്ചവരെ അറസ്റ്റ് ചെയ്യാമെന്ന്ജയ് പ്രകാശ് അറിയിച്ചുവെന്നാണ് സ്ത്രീയുടെ പരാതി. ഇത് പറഞ്ഞ് എസ്ഐ തന്നെ നിരന്തരം മൊബൈലിൽ വിളിക്കുമായിരുന്നുവെന്നും അവർ പറഞ്ഞു. ഇത് നിരസിച്ചതോടെ എസ്ഐ കേസ് അന്വേഷണം അവസാനിപ്പിച്ച് റിപ്പോർട്ട് നൽകിയെന്നും അവർ ആരോപിച്ചു. ഫെബ്രുവരി 12ന് റാംപുറിലെ ബന്ധുവിനെ സന്ദർശിക്കാൻ പോയപ്പോളാണ് സ്ത്രീയെ രണ്ടു പേർ ചേർന്ന് ബലാത്സംഗം ചെയ്തത്. ഇതിൽ ഒരാൾ ഇവരുടെ പരിചയക്കാരനായിരുന്നു. പരിചയത്തിന്റെ പേരിൽ വണ്ടിയിൽ കയറിയ ഇവരെ തോക്കു ചൂണ്ടി പീഡിപ്പിച്ചു എന്നാണ് കേസ്. എന്നാൽ തുടക്കത്തിൽ കേസ് രജിസ്റ്റർ ചെയ്യാൻ പോലീസ് വിസമ്മതിച്ചുരുന്നു. തുടർന്ന് സ്ത്രീ കോടതിയിൽ പോയതിനെ തുടർന്നാണ് കേസെടുക്കാൻ പോലീസ് തയ്യാറായത്. ഇതിന്റെ അടിസ്ഥാനത്തിൽ അമീർ അഹമ്മദ്, സത്താർ അഹമ്മദ് എന്നിവർക്കെതിരെ പോലീസ് കേസെടുത്തിരുന്നു. ഇവരുടെ മൊഴിയും രേഖപ്പെടുത്തിയതായി പോലീസ് അറിയിച്ചു. എസ്ഐക്ക് എതിരായ പരാതിയെക്കുറിച്ച് അന്വേഷിച്ച് റിപ്പോർട്ട് സമർപ്പിക്കാൻ ഗഞ്ച് സ്റ്റേഷൻ ഓഫീസർക്ക് നിർദേശം നൽകിയതായി എസ്പി സുധ സിങ് പറഞ്ഞു.
ബാഗ്ദാദ്: ഇസ്ലാമിക് സ്റ്റേറ്റ് (ഐഎസ്) നേതാവ് അബുബക്കർ അൽ ബാഗ്ദാദി ഖലീഫയായി സ്വയം പ്രഖ്യാപനം നടത്തിയ മൊസൂളിലെ ഗ്രേറ്റ് മോസ്ക് ഓഫ് അൽ നൂറി തകർക്കപ്പെട്ടു. ബുധനാഴ്ച ഐഎസും അമേരിക്കൻ നേതൃത്വത്തിലുള്ള സഖ്യസേനയും തമ്മിൽ നടന്ന ഏറ്റുമുട്ടലിൽ ഐഎസാണ് പള്ളി തകർത്തത്. 800 വർഷത്തിലേറെ പഴക്കമുള്ള പള്ളി മൊസൂളിന്റെ അടയാളമായാണ് കരുതപ്പെട്ടിരുന്നത്. നൂറി മോസ്കിന് സമീപമുള്ള അൽ ഹദ്ബ മിനാരവുംതകർക്കപ്പെട്ടു. 1172-ൽ പണികഴിക്കപ്പെട്ട ഹദ്ബ ഇറാഖിന്റെ പിസ ടവർ എന്നാണ് അറിയപ്പെട്ടിരുന്നത്. പള്ളി തകർക്കപ്പെട്ടത് ഇറാഖിലെയും മൊസൂളിലേയും ജനങ്ങൾക്കെതിരായ കുറ്റകൃത്യമെന്നാണ് സഖ്യസേന വിശേഷിപ്പിച്ചത്. എന്നാൽ അത് തള്ളിയ ഐഎസ് അമേരിക്കൻ നേതൃത്വത്തിലുള്ള സഖ്യസേനയുടെ വ്യോമാക്രമണത്തിലണ് പള്ളി തകർന്നതെന്ന് ആരോപിച്ചു. മൊസൂളിലെ പള്ളി തകർത്തത് വഴി ഐഎസ് ചരിത്രപരമായ കുറ്റകൃത്യമാണ് ചെയ്തതെന്ന്സൈനിക ഉദ്യോഗസ്ഥൻ പ്രതികരിച്ചു. യു.എസ് നേതൃത്വത്തിലുള്ള സൈന്യം ഐഎസിനെതിയായ ആക്രമണം ആരംഭിച്ച് നാലാം ദിവസമാണ് പള്ളി തകർത്തത്. കഴിഞ്ഞ എട്ടു മാസമായി ഐഎസ് നിയന്ത്രണത്തിലുള്ള നഗരം പിടിച്ചടക്കാൻ സൈന്യം ശ്രമം നടത്തി വരികയായിരുന്നു. ബാഗ്ദാദി ഖലീഫയായി സ്വയം പ്രഖ്യാപനം നടത്തി മൂന്ന് വർഷത്തിന് ശേഷം ഇറാഖിലെയും സിറിയയിലേയും നിരവധി ചരിത്ര സ്മാരങ്ങൾ തകർക്കപ്പെട്ടിരുന്നു. ഇറാഖിൽ ജനിച്ച ബാഗ്ദാദി 2014ൽ നൂറി മോസ്കിൽ വെച്ചാണ് സ്വയം ഖലീഫയായി പ്രഖ്യാപിച്ചത്. ബാഗ്ദാദിയുടെ അവസാനത്തെ പൊതുചടങ്ങും ഇതായിരുന്നു.
കൊച്ചി: ചെറിയ പെരുന്നാളിനുള്ള തിരക്ക് പ്രമാണിച്ച് എയർ ഇന്ത്യ എക്സ്പ്രസ് കൂടുതൽ സർവീസുകൾ നടത്തും. ദോഹയിൽനിന്ന് കൊച്ചി, തിരുവനന്തപുരം എന്നിവിടങ്ങളിലേയ്ക്കും തിരിച്ചുമാണ് ജൂൺ 24, 25, 30, ജൂലായ് ഒന്ന്തിയതികളിൽ കൂടുതൽ സർവീസ് നടത്തുന്നത്. തിരുവനന്തപുരത്തുനിന്ന് ദോഹയിലേയ്ക്ക് രാവിലെ 10ന് പുറപ്പെട്ട് 11.45ന് എത്തിച്ചേരും. നിലവിൽ ദോഹയിൽനിന്ന് ഇന്ത്യയിലേയ്ക്ക് ആഴ്ചയിൽ 14 എയർ ഇന്ത്യ എക്സ്പ്രസ് ഫ്ളൈറ്റുകളാണ് സർവീസ് നടത്തുന്നത്. ഇതിൽ ഏഴെണ്ണം കേരളത്തിലേയ്ക്കാണ്.
ലോസ് ആഞ്ജിലിസ്: അത്യാവശ്യ ഘട്ടങ്ങളിൽ തോക്ക് ഉപയോഗിക്കാൻ അമേരിക്കയിൽ അധ്യാപകർക്ക് പരിശീലനം. ലോസ് ആഞ്ജിലിസിലെ കൊളറാഡോ സ്കൂളിലാണ് പരിശീലന പരിപാടി സംഘടിപ്പിച്ചത്. 2012ൽ കണക്റ്റികട്ടിലെ സാന്റിഹുക്ക് സ്കൂളിൽ 20 വിദ്യാർത്ഥികളും ആറ് അധ്യാപകരും കൊല്ലപ്പെട്ട വെടിവയ്പ്പിന്റെ പശ്ചാത്തലത്തിലാണ് സ്കൂൾ പരിശീലന പരിപാടി ആരംഭിച്ചത്. സ്കൂളിൽ വെടിവെപ്പോ മറ്റോ ഉണ്ടാകുമ്പോൾ എങ്ങനെ തിരിച്ചുവെടിവയ്ക്കണമെന്നത് അടക്കമുള്ള കാര്യങ്ങളാണ് അധ്യാപകരെ പരിശീലിപ്പിക്കുന്നത്. മൂന്നു ദിവസം നീണ്ടുനിൽക്കുന്ന കോഴ്സായാണ് പരിശീലന പരിപാടി സംഘടിപ്പിച്ചത്. അത്യാഹിതമുണ്ടാകുമ്പോൾ എങ്ങനെ നേരിടണമെന്ന് പരിശീലിപ്പിക്കാൻ പോലീസ് ഉദ്യോഗസ്ഥരുടെ പ്രത്യേക ക്ലാസും സജ്ജീകരിച്ചിട്ടുണ്ട്. ഫാക്കൽറ്റി/ അഡ്മിനിസ്റ്റ്ട്രേറ്റർ സേഫ്റ്റി ട്രെയിനിങ്ങ് ആന്റ് എമർജെൻസി റെസ്പോൺസ് എന്നാണ് പരിശീലന പദ്ധതിയ്ക്ക് നൽകിയിരിക്കുന്ന പേര്. കൊളോറാഡോ നിയമം അനുസരച്ച് സ്കൂൾ ജീവനക്കാർക്ക് ആയുധം കൈവശം വയ്ക്കാവുന്നതാണ്. അടിയന്തര സാഹചര്യം ഉണ്ടാകുമ്പോൾ ആയുധം എങ്ങനെ ഉപയോഗിക്കണെമെന്നു മാത്രമല്ല, സാഹചര്യങ്ങളെ എങ്ങനെ നേരിടണമെന്നും അടിയന്തിര വൈദ്യസഹായം എങ്ങനെ നൽകണമെന്നും ഉൾപ്പെടെയുള്ള കാര്യങ്ങളിലും അധ്യാപകർക്ക് പരിശീലനം നൽകുന്നുണ്ട്.
തിരുവനന്തപുരം: അഡ്വ.ബി.സത്യൻ എം.എൽ.എ.യുടെ മകൻ ബോബി (17) അന്തരിച്ചു. ശ്വാസകോശ സംബന്ധമായ അസുഖത്തെ തുടർന്ന് ചികിത്സയിലായിരുന്നു. മാതാവ് ഡോ. ലീന (ആയുർവേദ മെഡിക്കൽ ഓഫീസർ) സഹോദരി ബ്ലസ്സി. ഇന്ന് പുലർച്ചെ നാല് മണിക്കായിരുന്നു അന്ത്യം. സംസ്കാരം വൈകിട്ട് മൂന്നിന് തിരുവനന്തപുരം നാലാഞ്ചിറയിലെ വീട്ടുവളപ്പിൽ.
മുംബൈ: ഒരു ലക്ഷം കോടി രൂപയുടെ വായ്പ തിരിച്ചടയ്ക്കുന്നതിൽ വീഴ്ച വരുത്തിയ മൂന്ന് സ്ഥാപനങ്ങൾക്കെതിരെ എസ്ബിഐ നടപടിക്കൊരുങ്ങുന്നു. എസ്സാർ സ്റ്റീൽ, ഭൂഷൻ സ്റ്റീൽ, ഇലക്ട്രോസ്റ്റീൽ സ്റ്റീൽസ് എന്നീ സ്ഥാപനങ്ങളുടെ കാര്യത്തിലാണ് ഇന്ന് തീരുമാനമെടുക്കുക. എസ്സാർ സ്റ്റീൽ 45,000 കോടി രൂപയും ഭൂഷൻ സ്റ്റീൽ 47,000 കോടിയും ഇലക്ട്രോസ്റ്റീൽ സ്റ്റീൽസ് 11,000 കോടി രൂപയുമാണ് എസ്ബിഐയ്ക്ക് ബാധ്യത വരുത്തിയിരിക്കുന്നത്. അതിനിടെ, പാപ്പരത്ത നിയമപ്രകാരം എബിജി ഷിപ്പിയാർഡ്, അലോക് ഇൻഡസ്ട്രീസ്, ജ്യോതി സ്ട്രക്ചേഴ്സ് എന്നിവയ്ക്കെതിരെ നടപടിയെടുക്കാൻ നാഷ്ണൽ കമ്പനി ലോ ട്രൈബ്യൂണലിനെ എസ്ബിഐ സമീപിച്ചിട്ടുണ്ട്. അലോക് ഇൻഡസ്ട്രീസ് 22,000 കോടിയും ജ്യോതി സ്ട്രക്ചേഴ്സ് 5,100 കോടി രൂപയുമാണ് എസ്ബിഐയ്ക്ക് നൽകാനുള്ളത്. വൻതുകയുടെ കിട്ടാക്കടം തിരിച്ചുപിടിക്കാനുള്ള നടപടികള്ക്ക് രൂപംനൽകാൻ ആർബിഐ ബാങ്കുകൾക്ക് നിർദേശം നൽകിയിരുന്നു. വൻതുക കിട്ടാക്കടമുള്ള 12 ബാങ്ക് അക്കൗണ്ടുകളുടെ വിവരങ്ങൾ റിസർവ് ബാങ്ക് കഴിഞ്ഞയാഴ്ചയാണ് ബാങ്കുകൾക്ക് നൽകിയത്.
ബെംഗളൂരു: ദക്ഷിണേഷ്യക്കാരല്ലാത്തവരോട് വിവേചനം കാണിക്കുന്നതായി ആരോപിച്ച് ഐടി ഭീമനായ ഇൻഫോസിസിന്റെ അമേരിക്കയിലെ രണ്ട് ഓഫീസർമാർക്കെതിരെ നിയമനടപടി. ദക്ഷിണേഷ്യക്കാരല്ലാത്ത ജീവനക്കാരോട് വംശീയമായ വിവേചനം കാട്ടുന്നതായി ആരോപിച്ച് ഇൻഫോസിസ് ജീവനക്കാരനായിരുന്നഎറിക് ഗ്രീൻ എന്ന അമേരിക്കക്കാരനാണ്പരാതി നൽകിയിരിക്കുന്നത്. ടെക്സസിലെ ഒരു ജില്ലാ കോടതിയിലാണ് ജൂൺ 19ന് പരാതി നൽകിയത്. കമ്പനിയുടെ മുതിർന്ന ഉദ്യോഗസ്ഥരായ വാസുദേവ നായിക്, ബിനോദ് ഹംപാപുർ എന്നിവർക്കെതിരെയാണ് വംശീയ വിവേചനം ആരോപിച്ച് പരാതി നൽകിയത്. ഇവരെ വിചാരണ ചെയ്യണമെന്നും ഹർജിയിൽ ആവശ്യപ്പെടുന്നു. ദേശീയത, വംശീയത എന്നിവയുടെ പേരിൽ ഇവർ ദക്ഷിണേഷ്യക്കാരല്ലാത്ത, വിശേഷിച്ച് ഇന്ത്യക്കാരല്ലാത്ത മറ്റു ജീവനക്കാരോട് വിവേചനപരമായി പെരുമാറിയതായി ഹർജിയിൽ ആരോപിക്കുന്നു. തുടർന്ന് എറിക് ഗ്രീനിന് ജോലി നഷ്ടപ്പെട്ടതായും പരാതിയിൽ പറയുന്നു. ഒരുവിധത്തിലുള്ള നടപടിക്രമങ്ങളും പാലിക്കാതെയാണ് തന്നെ ജോലിയിൽനിന്ന് പിരിച്ചുവിട്ടതെന്നും വംശീയതയാണ് നടപടിക്കു പിന്നിലെന്നും ഹർജിയിൽ ആരോപിക്കുന്നു. പുറംപണി കരാറുകൾക്കെതിരെ അമേരിക്കക്കാർക്കിടയിൽ ജനരോക്ഷം ഏറിവരികയും ഇക്കാര്യത്തിൽ ട്രംപ് ഭരണകൂടം പുതിയ നീക്കങ്ങൾ ആരംഭിക്കുകയും ചെയ്ത സാഹചര്യത്തിലാണ് വംശീയത ആരോപിച്ച് ഇത്തരമൊരു കേസ് ഫയൽ ചെയ്തിരിക്കുന്നത്. അടുത്ത രണ്ട് വർഷത്തിനിടയിൽ അമേരിക്കക്കാരായ 10,000 ജീവനക്കാരെ നിയമിക്കുമെന്ന് അടുത്തിടെ ഇൻഫോസിസ് പ്രഖ്യാപിക്കുകയും ചെയ്തിരുന്നു.
തിരുവനന്തപുരം: സംസ്ഥാനത്ത് പനി മരണങ്ങൾ തുടരുന്നു. സംസ്ഥാന സർക്കാരിന്റെ കണക്കുകൾ അനുസരിച്ച് 218 പേരാണ് ആറുമാസത്തിനുള്ളിൽ പനിബാധച്ച് മരിച്ചത്. ജൂണിൽ മാത്രം 32 പേർ മരിച്ചതായാണ് റിപ്പോർട്ടുകൾ.എച്ച് വൺ എൻ വൺ മരണമാണ് കൂടുതൽ റിപ്പോർട്ട് ചെയ്തിട്ടുള്ളത്. 55 പേരാണ് എച്ച് വൺ എൻ വൺ ബാധിച്ച് മരിച്ചത്. ഡങ്കിപ്പനി ബാധിച്ച് 13 പേരും എലിപ്പനി ബാധിച്ച് 9 പേരും മരിച്ചു. ഇന്നലെ മാത്രം 25000-ൽ കൂടുതൽ പേർ പനി ബാധിച്ച് സർക്കാർ ആശുപത്രികളിൽ എത്തി. ഇതിൽ 138 പേർക്ക് ഡങ്കിപ്പനിയും എട്ടു പേർക്ക് എച്ച് 1 എൻ 1 ഉം സ്ഥിരീകരിച്ചതായി ആരോഗ്യവകുപ്പിന്റെ കണക്കുകൾ വ്യക്തമാക്കുന്നു. സ്വകാര്യ ആശുപത്രികളിൽ ചികിത്സ തേടിയവരുടെ കണക്കുകൾ കൂടിയെടുത്താൽ സംഖ്യ ഇനിയും ഉയരും. ഇതിനിടെ പനിബാധിതപ്രദേശങ്ങളെ തീവ്രതയുടെ അടിസ്ഥാനത്തിൽ മൂന്നായി തരംതിരിക്കാനും കൂടിയ സ്ഥലങ്ങളിൽ കൂടുതൽ ഡോക്ടർമാരെ നൽകാനും മന്ത്രിസഭായോഗം തീരുമാനമെടുത്തിരുന്നു. കൂടിയത്, ഇടത്തരം, കുറഞ്ഞത് എന്നിങ്ങനെയായിരിക്കും തരംതിരിക്കുക. പ്രതിരോധപ്രവർത്തനങ്ങൾക്ക് പ്ലാൻഫണ്ടിൽനിന്ന് തദ്ദേശസ്ഥാപനങ്ങൾക്ക് പണമെടുക്കാനും സർക്കാർ അനുമതി നൽകി.
കോഴിക്കോട്: കൈവശഭൂമിക്ക് നികുതി സ്വീകരിക്കാൻ വില്ലേജ് അധികൃതർ തയ്യാറാകാത്തതിൽ മനംനൊന്ത് കർഷകൻ ആത്മഹത്യ ചെയ്ത സംഭവത്തിൽ ഉദ്യോഗസ്ഥനെ ജില്ലാ കലക്ടർ സസ്പെൻഡ് ചെയ്തു. വില്ലേജ് അസിസ്റ്റന്റ് സിലീഷിനെയാണ് സസ്പെൻഡ് ചെയ്തത്. റവന്യൂ മന്ത്രിയുടെ നിർദേശ പ്രകാരമാണ് കലക്ടറുടെ നടപടി. ഉത്തരവാദികളായ മറ്റ് ഉദ്യോഗസ്ഥർക്കെതിരെ അന്വേഷണത്തിന് ശേഷം നടപടിയെടുക്കുമെന്നും ആത്മഹത്യ ചെയ്ത ജോയിയുടെ കൈവശഭൂമിക്ക് നികുതി സ്വീകരിക്കാനുള്ള നടപടികൾ ഇന്നു തന്നെ സ്വീകരിക്കുമെന്നും കലക്ടർ അറിയിച്ചിട്ടുണ്ട്. സംഭവ സ്ഥലം സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. ജോയിയുടെ മകൾക്ക് ജോലി നൽകാൻ സർക്കാരിനോട് ശുപാർശ ചെയ്യുമെന്നും ജോയിയുടെ കുടുംബത്തിന്റെ കടം എഴുതിത്തള്ളാൻ നടപടി സ്വീകരിക്കുമെന്നും കലക്ടർ അറിയിച്ചിട്ടുണ്ട്. ചെമ്പനോട് താഴത്ത് അങ്ങാടിയിലുള്ള വില്ലേജ് ഓഫീസ് കെട്ടിടത്തിൽ ഇന്നലെയാണ് ജോയി തൂങ്ങി മരിച്ചത്. ജില്ലാ കളക്ടർ നേരിട്ടെത്തി കുറ്റക്കാർക്കെതിരെ നടപടിയെടുക്കുകയും നികുതി അടയ്ക്കാൻ അവസരമൊരുക്കുകയും ചെയ്യാതെ മൃതശരീരം നീക്കാൻ അനുവദിക്കില്ലെന്ന നിലപാടിലായിരുന്നു നാട്ടുകാർ. അതേസമയം റവന്യു മന്ത്രി ഇ ചന്ദ്രശേഖരൻ കലക്ടറോട് റിപ്പോർട്ട് സമർപ്പിക്കാൻ ആവശ്യപ്പെട്ട സാഹചര്യത്തിൽ വില്ലേജ് ഓഫീസറോട് അടിയന്തിരമായ വിശദീകരണം നൽകാൻ കളക്ടർ ഉത്തരവിട്ടു. സന്ദർശന വേളയിൽ കുറ്റക്കാർക്കെതിരെ നടപടിയെടുക്കുമെന്നും നികുതി സ്വീകരിക്കുന്നത് സംബന്ധിച്ച് ഒരാഴ്ചക്കകം നടപടിയെടുക്കും എന്നുമായിരുന്നു കളക്ടർ അറിയിച്ചത്. എന്നാൽ നാട്ടുകാർ പ്രതിഷേധവുമായെത്തിയതോടെ വില്ലേജ് അസിസ്റ്റൻന്റിനെ ഇന്നു തന്നെ സസ്പെൻഡ് ചെയ്യുമെന്നും നികുതി സ്വീകരിക്കാൻ ഇന്ന് തന്നെ അവസരമൊരുക്കുമെന്നും കളക്ടർ പ്രഖ്യാപിക്കുകയായിരുന്നു. അതേസമയം നടപടികൾ ഉണ്ടായ ശേഷം മാത്രമെ മൃതദേഹം നീക്കാൻ അനുവദിക്കൂ എന്ന കടുത്ത നിലപാടിലാണ് നാട്ടുകാർ. ആരോപണ വിധേയരായ ഉദ്യോഗസ്ഥർ നേരത്തെയും ഇത്തരത്തിൽ പെരുമാറിയതായി നാട്ടുകാർ കളക്ടറോട് പരാതി അറിയിച്ചു. ഇവിടെയുള്ള ഉദ്യോഗസ്ഥർ കൈക്കൂലിയടക്കം ആവശ്യപ്പെട്ടതായും നാട്ടുകാർ കളക്ടറെ അറിയിച്ചു. പരാതി ലഭിച്ചാൽ ഇത്തരം ഉദ്യോഗസ്ഥർ സർവീസിലുണ്ടാകില്ലെന്നും വില്ലേജ് ഓഫീസിലെ പ്രശ്നങ്ങൾ ഈ സംഭവത്തിന് ശേഷമാണ് താനറിഞ്ഞതെന്നും കളക്ടർ പറഞ്ഞു.
തിരുവനന്തപുരം:: പേരാമ്പ്ര ചക്കിട്ടപ്പാറയിൽ നികുതി സ്വീകരിക്കാൻ വില്ലേജ് ഓഫീസ് ഉദ്യോഗസ്ഥർ വിസമ്മതിച്ചതിൽ മനംനെന്ത് കർഷകൻ ആത്മഹത്യ ചെയ്ത സംഭവത്തിൽ കുറ്റക്കാരായ ഉദ്യോഗസ്ഥർക്കെതിരെ കൊലക്കുറ്റത്തിന് കേസെടുക്കണമെന്ന് പ്രതിപക്ഷ നേതാവ് രമേശ് ചെന്നിത്തല. കർഷകന്റെ ആത്മഹത്യ കേരളത്തിന്അപമാനമാണെന്നും അദ്ദേഹം പറഞ്ഞു. റവന്യു വകുപ്പിൽ വ്യാപകമായ അഴിമതിയാണ് നടക്കുന്നത്. ഇത്തരം സംഭവങ്ങൾക്കെല്ലാം കാരണം കൈക്കൂലിയാണ്. സംസ്ഥാനത്തെ മിക്കവാറും വില്ലേജ് ഓഫീസിലും ഇതുതന്നെയാണ് അവസ്ഥയെന്നും ചെന്നിത്തല പറഞ്ഞു. ഇതിനെതിരെ കർശനമായ നടപടിയെടുക്കാൻ റവന്യൂ വകുപ്പ് തയ്യാറാകാത്തതെന്താണെന്ന് അദ്ദേഹം ചോദിച്ചു.
മെൽബൺ: ഇന്ത്യൻ താരങ്ങളായ സായ് പ്രണീതും കിദംബി ശ്രീകാന്തും ഓസ്ട്രേലിയൻ ഓപ്പൺ സൂപ്പർ സീരീസ് ബാഡ്മിന്റൺ ക്വാർട്ടർ ഫൈനലിൽ. മികച്ച ഫോമിലുള്ള ശ്രീകാന്ത് ലോക ഒന്നാം നമ്പർ താരം സൺ വാൻ ഹുവിനെ അട്ടിമറിച്ചാണ് ക്വാർട്ടറിലെത്തിയത്. ആദ്യ ഗെയിം നഷ്ടപ്പെട്ട ശേഷം തിരിച്ചടിച്ച ശ്രീകാന്ത് രണ്ടും മൂന്നും ഗെയിം അനായാസം സ്വന്തമാക്കി. സ്കോർ: 15-21, 21-13, 21-13. 14-ാം റാങ്കുകാരനായ സായ് പ്രണീത് ചൈനയുടെ ഹുവാങ് യുക്സിയാങ്ങിനെ തോൽപ്പിച്ചാണ് അവസാന എട്ടിലെത്തിയത്. മൂന്നു ഗെയിം നീണ്ട പോരാട്ടത്തിനൊടുവിലായിരുന്നു സായ് പ്രണീതിന്റെ വിജയം. സ്കോർ: 21-15,18-21,21-13. അതേസമയം വനിതാ ഡബിൾസിൽ അശ്വിനി പൊന്നപ്പ-സിക്കി റെഡ്ഡി സഖ്യം ക്വാർട്ടർ കാണാതെ പുറത്തായി. സീസണിൽ മികച്ച ഫോമിലുള്ള ശ്രീകാന്ത് കഴിഞ്ഞ ദിവസം ഇന്തോനേഷ്യൻ സൂപ്പർ സീരീസ് പ്രീമിയർ കിരീടം നേടിയിരുന്നു. അന്ന് സെമിഫൈനലിൽ സൺ വാൻ ഹുവിനെ പരാജയപ്പെടുത്തിയ ശ്രീകാന്ത് ഇത് തുടർച്ചയായ രണ്ടാം തവണയാണ് ലോക ഒന്നാം നമ്പർ താരത്തെ അട്ടിമറിക്കുന്നത്. ഇന്തോനേഷ്യൻ സൂപ്പർ സീരീസ് പ്രീമിയർ വിജയത്തോടെ ലോകറാങ്കിങ്ങിൽ 11 സ്ഥാനം മെച്ചപ്പെടുത്തിയ ശ്രീകാന്ത് 11-ാം റാങ്കിലെത്തുകയും ചെയ്തു.
തിരുവനന്തപുരം: ജനനേന്ദ്രിയം മുറിച്ച കേസിൽ യുവതിയ്ക്ക് പോക്സോ കോടതിയുടെ വിമർശനം. കേസിൽ സിബിഐ അന്വേഷണം ആവശ്യപ്പെട്ടുള്ള യുവതിയുടെ ഹർജി പരിഗണിക്കവേയാണ് കോടതി വിമർശമുന്നയിച്ചത്. യുവതിയുടെ ഹർജിയിലെ വിഷയം കോടതിയുടെ പരിഗണനയിൽ വരുന്നതല്ലെന്ന് പ്രോസിക്യൂഷൻ വാദിച്ചു. നിയമ സാധുത പരിഗണിക്കാതെ അനാവശ്യ ഹർജികൾ നൽകുന്നത് കോടതിയുടെ സമയം നഷ്ടപ്പെടുത്തുന്നതായി കോടതി ചൂണ്ടിക്കാട്ടി. ഇപ്പോൾ കേസ് അന്വേഷിക്കന്ന പോലീസ്, കേസന്വേഷണം അട്ടിമറിക്കുന്നുവെന്ന് ആരോപിച്ചാണ് പരാതിക്കാരിയായ യുവതി കോടതിയെ സമീപിച്ചത്. യുവതിയുടെ ഹർജിയിൽ പോക്സോ കോടതി ഉച്ചക്കുശേഷം വിധിപറയും.
കോഴിക്കോട്: പുതുവൈപ്പിലെ ജനങ്ങളെ തല്ലിച്ചതച്ച പോലീസ് നടപടി ശരിയായില്ലെന്ന് ഡി.ജി.പി ജേക്കബ് തോമസ്. പോലീസ് ജനങ്ങളെ സഹോദരങ്ങളെ പോലെ കാണണമെന്നും ജേക്കബ് തോമസ് പറഞ്ഞു. കോഴിക്കോട് പാറോപ്പടി സിൽവർ ഹിൽസ് സ്കൂളിൽ നടന്ന ചടങ്ങിൽ പങ്കെടുത്ത് സംസാരിക്കുകയായിരുന്നു അദ്ദേഹം. ആര് ജനങ്ങളെ ആക്രമിച്ചാലും ശരിയല്ല. പോലീസ് ജനങ്ങളെ കാണുന്നതു പോലെ ജനങ്ങളും പോലീസുകാരെ സഹോദരങ്ങളായി കാണണമെന്നും അദ്ദേഹം പറഞ്ഞു. ഡി.സി.പി യതീഷ് ചന്ദ്രയുടെ നടപടി ശരിയല്ലെന്നാണോ പറഞ്ഞത് എന്ന മാധ്യമ പ്രവർത്തകരുടെ ചോദ്യത്തിന് ഒരു പോലീസുകാരനും അങ്ങനെ ചെയ്യുന്നത് ശരിയല്ലെന്നായിരുന്നു അദ്ദേഹത്തിന്റെ മറുപടി. പുതുവൈപ്പിൽ ഐ.ഒ.സി പ്ലാന്റ് സ്ഥാപിക്കുന്നതിനെതിരെ സമരം നടത്തിയ നാട്ടുകാരെ ഡി.സി.പി യതീഷ് ചന്ദ്രയുടെ നേതൃത്വത്തിൽ മർദിച്ചിരുന്നു. ഇത് വ്യാപക പ്രതിഷേധത്തിന് വഴിവെക്കുകയും ചെയ്തു. എന്നാൽ പോലീസ് നടപടിയെ ന്യായീകരിച്ച് ക്രമസമാധാന ചുമതലയുള്ള ഡി.ജി.പി സെൻകുമാറും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും രംഗത്തെത്തിയിരുന്നു. പ്രധാനമന്ത്രിയുടെ സുരക്ഷ ഉറപ്പാക്കാനുള്ള സാധാരണ നടപടിയാണ് പോലീസ് സ്വീകരിച്ചതെന്നായിരുന്നു ഇരുവരും പ്രതികരിച്ചത്.
തിരുവനന്തപുരം: കേരള അഡ്മിനിസ്ട്രേറ്റീവ് ട്രൈബ്യൂണലിലേക്ക് മന്ത്രിസഭ അംഗീകരിച്ച സർക്കാർ പ്ലീഡർമാരുടെ പട്ടിക തിരുത്തി നിയമവകുപ്പിന്റെ ഉത്തരവ്. അഡ്വക്കേറ്റ് ജനറൽ കൊടുത്ത ശുപാർശ അതേപടി മന്ത്രിസഭാ യോഗം അംഗീകരിച്ചെങ്കിലും പട്ടികയിലെ ആദ്യ പേരുകാരിയെ ഒഴിവാക്കിയാണ് ഉത്തരവിറങ്ങിയത്. ആദിവാസി വിഭാഗത്തിൽപ്പെട്ട തിരുവനന്തപുരം സ്വദേശി സിജ പി.ജെയെ ആണ് ഒഴിവാക്കിയത്. മൂന്നു വർഷത്തേക്കോ 60 വയസ് തികയും വരെയോ ആണ് പ്ലീഡർമാരുടെ നിയമനം. മന്ത്രിസഭായോഗത്തിന്റെ തീരുമാനം രണ്ട് സീനിയർ സർക്കാർ പ്ലീഡർമാരെയും നാല് സർക്കാർ പ്ലീഡർമാരെയും നിയമിക്കുന്നതിനായി യഥാക്രമം ആറും 12ഉം പേരുടെ പട്ടികയാണ് അഡ്വക്കേറ്റ് ജനറൽ നൽകിയത്. ഉത്തരവിന്റെ കോപ്പി സീരിയൽ നമ്പറിൽ ആദ്യമുള്ളവരെ അംഗീകരിക്കണമെന്ന് മന്ത്രിസഭയ്ക്കുള്ള ശുപാർശ കുറിപ്പിലുണ്ട്. ശുപാർശ 2017 മാർച്ച് 29ന് ചേർന്ന മന്ത്രിസഭ അംഗീകരിച്ചെങ്കിലും സർക്കാർ പ്ലീഡർമാരിൽ ആദ്യസ്ഥാനത്തുള്ള സിജയെ ഒഴിവാക്കി ഉത്തരവിറങ്ങുകയായിരുന്നു. പുതിയ ഉത്തരവിൽ രണ്ട് സീനിയർമാരും മൂന്ന് സർക്കാർ പ്ലീഡർമാരും മാത്രമാണുള്ളത്. ഉദ്യോഗസ്ഥ തലത്തിലെ ജാതി വിവേചനമാണ് നിയമനം അട്ടിമറിച്ചതിന് പിന്നിലെന്നാണ് ആക്ഷേപം. ഈ വിഷയത്തെക്കുറിച്ച് അറിയില്ലെന്നും പ്രതികരിക്കാനില്ലെന്നും ഉത്തരവിൽ ഒപ്പിട്ട നിയമസെക്രട്ടറി മാതൃഭൂമി.കോമിനോട് പ്രതികരിച്ചു.
തിരുവനന്തപുരം: ഉമ്മൻ ചാണ്ടിയുടെ നേതൃത്വത്തിൽ കൊച്ചി മെട്രോയിൽ നടത്തിയ ജനകീയ യാത്രയിൽ ഉണ്ടായ ബുദ്ധിമുട്ടുകളിൽ ഖേദം പ്രകടിപ്പിച്ച് പ്രതിപക്ഷ നേതാവ് രമേശ് ചെന്നിത്തല. യുഡിഎഫ് നേതാക്കളെ ഉദ്ഘാടന ചടങ്ങിൽ അവഗണിച്ചതിലുള്ള പ്രതിഷേധമാണ് പ്രകടിപ്പിച്ചതെന്ന് അദ്ദേഹം പറഞ്ഞു. സംഭവത്തിൽ ആർക്കെങ്കിലും ആക്ഷേപമുണ്ടെങ്കിൽ നിർവ്യാജം ഖേദിക്കുന്നുവെന്നും ചെന്നിത്തല പറഞ്ഞു. സംഭവത്തിൽ ഏതെങ്കിലും തരത്തിലുള്ള നാശനഷ്ടമോ, ബുദ്ധിമുട്ടോ ഉണ്ടാകുമെന്നു കരുതിയില്ല. പ്രവർത്തകരുടെ വികാരമാണ് അവിടെ പ്രകടമായത്. കെഎംആർഎൽ ഉൾപ്പെടെ ഉന്നയിച്ച പരാതികളിൽ നിർവ്യാജം ഖേദിക്കുന്നുവെന്നും ചെന്നിത്തല പറഞ്ഞു. നേരത്തെ ഉമ്മൻ ചാണ്ടിയുടെ നേതൃത്വത്തിൽ മെട്രോയിൽ നടത്തിയ ജനകീയ യാത്രയെക്കുറിച്ച് കൊച്ചി മെട്രോ റെയിൽ ലിമിറ്റഡ് (കെ.എം.ആർ.എൽ.) മാനേജിങ് ഡയറക്ടർ റിപ്പോർട്ട് തേടിയിരുന്നു. മെട്രോ നയങ്ങൾക്കെതിരായ പ്രവർത്തനങ്ങൾ യാത്രയിലുണ്ടായതിന്റെ അടിസ്ഥാനത്തിലാണ് റിപ്പോർട്ട് തേടിയത്. സ്റ്റേഷനുകളുടെ ചുമതലയുള്ളവരിൽ നിന്നുൾപ്പെടെയാണ് റിപ്പോർട്ട് തേടിയിരിക്കുന്നത്. മൂന്നു ദിവസത്തിനകം റിപ്പോർട്ട് നൽകണമെന്നും ആവശ്യപ്പെട്ടിട്ടുണ്ട്. സ്റ്റേഷനുകളിലെ വീഡിയോ ദൃശ്യങ്ങൾ പരിശോധിച്ച ശേഷമാണ് ചുമതലയുള്ളവർ റിപ്പോർട്ട് നൽകുക. റിപ്പോർട്ടിന്റെ അടിസ്ഥാനത്തിൽ നടപടികൾ തീരുമാനിക്കുമെന്ന് കൊച്ചി മെട്രോ അധികൃതർ പറഞ്ഞു. ഉമ്മൻചാണ്ടിയുടെ നേതൃത്വത്തിൽ ആലുവയിൽ നിന്ന് പാലാരിവട്ടം വരെയായിരുന്നു ജനകീയ യാത്ര. പ്രവർത്തകരുടെ തള്ളിക്കയറ്റം മൂലം ട്രെയിനിൽ മറ്റു യാത്രക്കാർക്ക് ഏറെ ബുദ്ധിമുട്ടുണ്ടായതിന് പുറമേ പാലാരിവട്ടത്ത് ഓട്ടോമാറ്റിക് ഫെയർ കളക്ഷൻ സംവിധാനത്തിന്റെ പ്രവർത്തനം നിർത്തിവയ്ക്കേണ്ടിയും വന്നു. ട്രെയിനിലും സ്റ്റേഷനിലും പ്രവർത്തകർ മുദ്രാവാക്യം മുഴക്കിയതും മെട്രോ ചട്ടങ്ങളുടെ ലംഘനമായി.
കല്യാൺ: വിമാനത്താവള നിർമാണത്തിനായി കൃഷിഭൂമി ഏറ്റെടുക്കുന്നതിൽ പ്രതിഷേധിച്ച് മഹാരാഷ്ട്രയിൽ കർഷകർ നടത്തിയ പ്രക്ഷോഭം അക്രമാസക്തമായി. പോലീസുകാരടക്കം ഏതാനും പേർക്ക് പരിക്കേറ്റതായി റിപ്പോർട്ടുണ്ട്. പോലീസുമായി ഏറ്റുമുട്ടിയ സമരക്കാർ മൂന്ന് പോലീസ് വാഹനങ്ങൾക്ക് തീയിട്ടു. താനെ- ബദ്ലാപുർ ദേശീയപാതയിൽ ഗതാഗതം തടസ്സപ്പെടുത്തിയ സമരക്കാർ റോഡിൽടയർ കത്തിച്ചു. ഉപേക്ഷിക്കപ്പെട്ട ഒരു വ്യോമതാവളം ഉൾപ്പെടുന്ന പ്രദേശത്ത് പുതിയ വിമാനാത്താവളം നിർമിക്കുന്നതിനായി കർഷകരെ ഒഴിപ്പിച്ചതിനെ തുടർന്നാണ് പ്രദേശത്തെ കർഷകർ സമരവുമായി രംഗത്തെത്തിയത്. തങ്ങൾ തലമുറകളായി കൃഷിചെയ്യുന്ന ഭൂമിയാണിതെന്നാണ് കർഷകരുടെ വാദം. എന്നാൽ, പ്രതിരോധവകുപ്പിന്റെ ഭൂമിയാണിതെന്നാണ് സർക്കാർ പറയുന്നത്. സർക്കാർ ഭൂമിയിലാണ് വിമാനത്താവളം നിർമിക്കുന്നതെന്നും അതിനാൽ കുടിയൊഴിപ്പിക്കപ്പെട്ട കർഷകർക്ക്നഷ്ടപരിഹാരം നൽകാനാവില്ലെന്നുമാണ്സർക്കാർ നിലപാട്. ഇതിനെതിരെയാണ് കർഷകർ പ്രക്ഷോഭവുമായി രംഗത്തെത്തിയത്.
സോൾ: അമേരിക്കൻ പ്രസിഡന്റ് ഡൊണാൾഡ് ട്രംപിനെ രൂക്ഷമായ ഭാഷയിൽ വിമർശിച്ച് ഉത്തര കൊറിയ. ട്രംപ് മനോരോഗിയാണെന്ന് ഉത്തര കൊറിയൻ സർക്കാരിന്റെ നിയന്ത്രണത്തിലുള്ള പത്രം റിപ്പോർട്ട് ചെയ്തു. ഉത്തര കൊറിയയുമായി ഏറ്റുമുട്ടൽ നടത്തി ആഭ്യന്തര രാഷ്ട്രീയ പ്രതിസന്ധികളിൽനിന്ന് രക്ഷപ്പെടാനാണ് ട്രംപ് ശ്രമിക്കുന്നത്. മനോരോഗിയായ ട്രംപ് അമേരിക്കയുടെ പിന്നാലെ പോകുന്ന ദക്ഷിണ കൊറിയയെ നാശത്തിലേയ്ക്കാണ് നയിക്കുകയെന്ന കാര്യം ദക്ഷിണ കൊറിയ തിരിച്ചറിയണമെന്നും പത്രം പ്രസിദ്ധീകരിച്ച മുഖപ്രസംഗത്തിൽ പറയുന്നു. ഉത്തരകൊറിയൻ ജയിലിൽനിന്ന് അബോധാവസ്ഥയിൽ വിട്ടുനൽകിയ അമേരിക്കൻ വിദ്യാർഥിയായ ഓട്ടോ വാമ്പിയർ മരിച്ച സംഭവം ഉത്തരകൊറിയയും അമേരിക്കയും തമ്മിൽ സംഘർഷം രൂക്ഷമാക്കിയിരുന്നു. ആണവ-മിസൈൽ പരീക്ഷണങ്ങളെ തുടർന്ന്ഇരു രാജ്യങ്ങൾക്കുമിടയിൽ അസ്വാരസ്യം നിലനിൽക്കുന്ന സാഹചര്യത്തിലായിരുന്നു ഇത്. ഇതിന്റെ തുടർച്ചയായാണ് അമേരിക്കയ്ക്കു നേരെ ഉത്തരകൊറിയയുടെ പുതിയ പ്രകോപനം.
ജെയ്പുർ: റേഷൻ സബ്സിഡി പറ്റുന്നവരടെ വീടിന്റെ ചുവരിൽ ഞാൻ ദരിദ്രനാണ് എന്ന് എഴുതി രാജസ്ഥാൻ സർക്കാർ. ഞാൻ ദരിദ്രനാണ്, ഞാൻ പരമ ദരിദ്രനാണ് എന്നിങ്ങനെയുള്ള വാക്യങ്ങളാണ് സർക്കാർ ചിലവിൽ വീടുകളുടെ പുറത്ത് എഴുതിവച്ചിരിക്കുന്നത്. എന്നാൽ സബ്സിഡികൾ ഉറപ്പാക്കാൻ എന്ന പേരിൽ സർക്കാർ ആവിഷ്കരിച്ച പദ്ധതി സാമ്പത്തികമായി പിന്നോക്കം നിൽക്കുന്നവരെ അപമാനിക്കുന്ന നടപടിയാണെന്ന ആക്ഷേപം ഇതിനകം തന്നെ ഉയർന്നിട്ടുണ്ട്. ദേശീയ ഭക്ഷ്യ സുരക്ഷ നിയമ പ്രകാരം കിട്ടുന്ന റേഷന്റെ വിഹിതമടക്കമാണ് വീടുകൾക്ക് മുന്നിൽ പ്രദർശിപ്പിച്ചിരിക്കുന്നത്. ഇത് തങ്ങൾക്ക് വലിയ അപമാനമാണെന്ന് ആളുകൾ പ്രതികരിച്ചു. വീടിന് മുന്നിലൂടെ കടന്നു പോകുന്നവർ തങ്ങളെ കളിയാക്കുന്നു. ഇതിൽ ലജ്ജ തോന്നുന്നുവെന്നും അവർ പറഞ്ഞു. കുറച്ച് ഗോതമ്പിനായി സർക്കാർ തങ്ങളുടെ ചുവരുകൾ വൃത്തികേടാക്കിയെന്ന് മറ്റൊരു ഗ്രാമീണൻ പ്രതികരിച്ചു. മൂന്ന് അംഗങ്ങളുള്ള കുടുംബത്തിന് വെറും 15 കിലോ മാത്രമാണ് സർക്കാർ നൽകുന്നത്. ഇതിനായാണ് ഞങ്ങളുടെ ചുവരുകൾ വൃത്തകേടാക്കുന്നത്. സർക്കാർ പാവപ്പെട്ടവരെ കളിയാക്കുകയാണെന്നും അവർ പറഞ്ഞു. ദൗസ ജില്ലയിലെ ഒന്നര ലക്ഷത്തോളം വീടുകളിൽ ഇതിനകം തന്നെ പെയിന്റിങ് പൂർത്തിയായിട്ടണ്ട്. ഉടൻ തന്നെ സംസ്ഥാനം മുഴുവൻ ഇത് വ്യാപിപ്പിക്കാനാണ് സർക്കാർ തിരുമാനം.
ന്യൂഡൽഹി: അനിൽ കുംബ്ലെയുടെ പിൻഗാമി ആരെന്നറിയാനുള്ള ആകാംക്ഷയിലാണ് ക്രിക്കറ്റ് ലോകം.സച്ചിനും ഗാംഗുലിയും ലക്ഷ്മണുമടങ്ങുന്ന ക്രിക്കറ്റ് ഉപദേശക സമിതിയുടെ തീരുമാനമാകും ഇതിൽ നിർണായകം. വീരേന്ദർ സെവാഗ്, ടോം മൂഡി, റിച്ചാർഡ് പയ്ബസ്, ലാൽചന്ദ് രജ്പുത്, ദൊഡ്ഡ ഗണേഷ് എന്നിവരിൽ നിന്ന് ആരെങ്കിലുമാകും ഇന്ത്യൻ ടീമിന്റെ പരിശീലകക്കുപ്പായമണിയുക എന്നതായിരുന്നു ഇതുവരെയുള്ള കണക്കുകൂട്ടൽ. എന്നാൽ അതിൽ പുതിയൊരു വഴിത്തിരിവുണ്ടായിരിക്കുകയാണ്. മുൻ താരവും ഇന്ത്യൻ ടീമിന്റെ ടെക്നിക്കൽ ഡയറക്ടറുമായ രവി ശാസ്ത്രി പരിശീലകനായി വരുമെന്നാണ് പുതിയ റിപ്പോർട്ട്. വിരാട് കോലിയുടെ താത്പര്യവും അതു തന്നെയാണ്. ശാസ്ത്രിയെ പരിശീലകനായി കൊണ്ടുവരുന്ന കാര്യം ആലോചിക്കുന്നുണ്ടെന്നും കൂടുതൽ ചർച്ചകൾക്കുശേഷം തീരുമാനമുണ്ടാകുമെന്നും ബി.സി.സി.ഐയോട് അടുത്ത വൃത്തങ്ങൾ പറയുന്നു. പരിശീലകനെ കണ്ടെത്താൻ ഉപദേശക സമിതി കൂടുതൽ സമയം ചോദിച്ചതിനാൽ വിൻഡീസ് പരമ്പരയ്ക്ക് ശേഷമായിരിക്കും ഇക്കാര്യത്തിൽ തീരുമാനമുണ്ടാകുക. അതിനുശേഷം നടക്കുന്ന ശ്രീലങ്കക്കെതിരായ പരമ്പരയിൽ ഇന്ത്യ കളിക്കാനിറങ്ങുന്നത് പുതിയ പരിശീലകന്റെ കീഴിലാകും. ഇപ്പോഴുള്ള അപേക്ഷകരിൽ ബി.സി.സി.ഐ തൃപ്തരല്ല. സെവാഗിന് പരിശീലകനെന്ന നിലയിൽ അനുഭവസമ്പത്ത് കുറവാണെന്നും ടെക്നിക്ക്സ് പഠിപ്പിക്കാൻ സെവാഗിന് സാധിക്കില്ലെന്നുമാണ് ബി.സി.സി.ഐയുടെ വിലയിരുത്തൽ. അതുകൊണ്ടു തന്നെ പുതിയ അപേക്ഷ ക്ഷണിച്ച് ബി.സി.സി.ഐ വീണ്ടും പരസ്യം ചെയ്തിട്ടുണ്ട്. മെയ് 31 വരെയാണ് അപേക്ഷ അയക്കേണ്ട കാലാവധി.
തൃശൂർ: തൃശൂർ ശ്രീനാരായണപുരം അഞ്ചാംപരത്തിയിൽ യുവമോർച്ച നേതാവിന്റെ വീട്ടിൽ നടന്ന റെയ്ഡിൽ ഒന്നര ലക്ഷം രൂപയുടെ കള്ളനോട്ടും കള്ളനോട്ടടിക്കുന്ന യന്ത്രവും കണ്ടെടുത്തു. ശ്രീനാരായണപുരം ഏരാശേരി രാജേഷിന്റെ വീട്ടിൽ നടന്ന റെയ്ഡിലാണ് കള്ളനോട്ട് യന്ത്രം കണ്ടെത്തിയത്. വീടിന്റെ മുകളിലത്തെ നിലയിലെ പ്രത്യേകം തയാറാക്കിയ മുറിയിലാണ് കള്ളനോട്ട് അടിച്ചുവന്നിരുന്നത്. 2000, 500, 50, 20 രൂപയുടെ വ്യാജനോട്ടുകളാണ് കണ്ടെത്തിയത്. കംപ്യൂട്ടറിൽ നോട്ട് തയാറാക്കി എ.ഫോർ പേപ്പറിൽ പ്രിന്റെടുത്ത് മുറിച്ചാണ് ഉപയോഗിച്ചുവന്നത്. പെട്രോൾ പമ്പിലും ബാങ്കിലുമാണ് രാജേഷ് നോട്ടുകൾ മാറിയിരുന്നത്. ബാങ്കുകാർ നൽകിയ വിവരത്തിന്റെ അടിസ്ഥാനത്തിൽ ഏറെ നാളായി ഇയാൾ പോലീസ് നിരീക്ഷണത്തിലായിരുന്നു. ഒബിസിമോർച്ചയുടെ കൈപ്പമംഗലം നിയോജക മണ്ഡലം സെക്രട്ടറിയാണ് രാജേഷ്.രാജേഷ് തിരുവനന്തപുരത്തേക്ക് പോയിരിക്കുകയാണ്. ഇയാളുടെ സഹോദരനും ഇതിൽ പങ്കുണ്ടെന്ന് സൂചനയുണ്ട്.പലിശയ്ക്ക് പണം നൽകുന്ന ഇടപാടും ഇവർക്കുണ്ടായിരുന്നു.
കാബൂൾ: അഫ്ഗാനിസ്താനിലെ ന്യൂ കാബൂൾ ബാങ്കിന്റെ ബ്രാഞ്ചിനു സമീപം നടന്ന ചാവേറാക്രമണത്തിൽ 26 പേർ മരിച്ചു. ഹെൽമണ്ട് പ്രവിശ്യയിലെ ലഷ്കർഗയിൽ നടന്ന കാർ ബോംബ് സ്ഫോടനത്തിൽ 50-ൽ അധികം ആളുകൾക്ക് പരിക്കേറ്റിട്ടുമുണ്ട്. പ്രാദേശിക സമയം ഉച്ചയ്ക്ക് 12 മണിക്കാണ് ആക്രമണം ഉണ്ടായത്. ഈദ് അവധിക്കാലവുമായി ബന്ധപ്പെട്ട് ബാങ്കിൽ വലിയ തിരക്കായിരുന്നു. പരിക്കേറ്റവരിൽ പോലീസുകാരും സൈനികരും ബാങ്ക് ജീവനക്കാരും ഉൾപ്പെടും. ആക്രമണത്തിനു പിന്നിൽ ആരാണെന്ന് ഇതുവരെ കണ്ടെത്താനായിട്ടില്ല.
ന്യൂഡൽഹി: കർഷകരുടെ വായ്പ എഴുതി തള്ളുന്നത് രാജ്യത്ത് ഒരു ഫാഷനായി മാറിയെന്ന് കേന്ദ്രമന്ത്രി വെങ്കയ്യ നായിഡു. വായ്പ എഴുതി തള്ളുക എന്നത് ഒരു അവസാന പരിഹാരമാർഗമല്ല. കർഷകരോടൊപ്പം സാമ്പത്തിക സംവിധാനത്തെയും ശ്രദ്ധയോടെ കൈകാര്യം ചെയ്യേണ്ടതുണ്ട്. അതുകൊണ്ട് തന്നെ വായ്പ എഴുതി തള്ളൽ എന്നത് പ്രശ്നപരിഹാരത്തിനുള്ള അവസാനമാർഗമായി കാണരുതെന്നും അദ്ദേഹം പറഞ്ഞു. കർണാടക സർക്കാർ കഴിഞ്ഞ ദിവസം ജൂൺ 20 ന് മുമ്പായുള്ള 50,000 വരെയുള്ള എല്ലാ കാർഷിക കടങ്ങളും എഴുതി തള്ളുന്നതായി അറിയിച്ചിരുന്നു. ഇത് 8165 കോടിയുടെ ബാധ്യതയാണ് സംസ്ഥാന സർക്കാരിനുണ്ടാക്കുക. കർണാടകയ്ക്ക് പുറമെ പഞ്ചാബ്, മഹാരാഷ്ട്ര, ഉത്തർപ്രദേശ് സർക്കാരുകളും കർഷകരുടെ കടങ്ങൾ എഴുതി തള്ളുമെന്ന് പ്രഖ്യാപിച്ചിരുന്നു. ഈയൊരു സാഹചര്യത്തിലാണ് കേന്ദ്ര മന്ത്രി വെങ്കയ്യ നായിഡുവിന്റെ പ്രതികരണം.
തിരുവനന്തപുരം: കൊച്ചി മെട്രോയിൽ ചട്ടം ലംഘിച്ച് ജനകീയ യാത്ര സംഘടിപ്പിക്കുകയും ഉപകരണങ്ങൾതകരാറിലാക്കുകയും ചെയ്ത ഉമ്മൻചാണ്ടിയും രമേശ് ചെന്നിത്തലയും അടക്കമുള്ളവർക്കെതിരെ നടപടിയെടുക്കണമെന്ന ആവശ്യവുമായി സി.പി.എം രംഗത്ത്. ഉദ്ഘാടന ചടങ്ങിൽ ജനപ്രതിനിധികളെ ഒഴിവാക്കിയതിൽ പ്രതിഷേധിച്ച് ഈ മാസം 20നാണ് ഉമ്മൻചാണ്ടിയുടെ നേതൃത്വത്തിൽ നേതാക്കളും പ്രവർത്തകരും മെട്രോയിൽ കയറിയത്. ഇതേ തുടർന്ന് പൊതുമുതൽ നശിച്ചെന്നും ടിക്കറ്റെടുക്കാതെ യാത്ര ചെയ്തെന്നും സി.പി.എം ആലുവ ഏരിയ സെക്രട്ടറി അഡ്വ.വി.സലിം കെ.എം.ആർ.എൽ എംഡിക്കയച്ച കത്തിൽ പറയുന്നു. പ്രതിഷേധങ്ങൾക്ക് വിലക്കുള്ള മെട്രോ സ്റ്റേഷനിൽ പ്രകടനം നടത്തുകയും മുദ്രാവാക്യം വിളിക്കുകയും ചെയ്തു. ടിക്കറ്റെടുക്കാതെ ഉൾക്കൊള്ളുന്നതിലധികം ആളുകൾ മെട്രോയിൽ കയറി സിഗ്നൽ സംവിധാനം തകരാറിലാക്കിയെന്നും പരാതിയിൽ പറയുന്നു. സുരക്ഷാ പരിശോധനയ്ക്കുള്ള മെറ്റൽ ഡിറ്റക്ടർ ഇളകിവീഴുകയും ഓട്ടോമാറ്റിക് ഫെയർ കളക്ഷൻ ഗേറ്റുകൾ പ്രവർത്തന രഹിതമാവുകയും ചെയ്തു. ഇത് യാത്രക്കാർക്കും ജീവനക്കാർക്കും ബുദ്ധിമുട്ടുണ്ടാക്കി. ഉമ്മൻചാണ്ടിയെയും ചെന്നിത്തലയെയും കൂടാതെ പ്രതിഷേധത്തിന് നേതൃത്വം കൊടുത്ത എം.എൽ.എമാരായ വി.കെ ഇബ്രാഹിംകുഞ്ഞ്, അനൂപ് ജേക്കബ്, അൻവർ സാദത്ത്, പി.ടി തോമസ്, ഹൈബി ഈഡൻ, മേയർ സൗമിനി ജെയിൻ, എം.എം ഹസൻ എന്നിവരും യാത്രയിൽ പങ്കാളികളായിരുന്നു. പ്രതിഷേധത്തിന്റെ ഭാഗമായ മുഴുവൻ പേർക്കെതിരെയും കേസെടുത്ത് നിയമനടപടി സ്വീകരിക്കണമെന്ന് കത്തിൽ പറയുന്നു.
വെല്ലിങ്ടൺ: ന്യൂസീലൻഡിന്റെ വിക്കറ്റ് കീപ്പർ ബാറ്റ്സ്മാൻ ലൂക്ക് റോഞ്ചി അന്താരാഷ്ട്ര ക്രിക്കറ്റിൽ നിന്ന് വിരമിച്ചു. കുടുംബ ജീവിത്തിൽ ശ്രദ്ധ കേന്ദ്രീകരിക്കാനാണ് കളി മതിയാക്കുന്നതെന്ന് റോഞ്ചി വ്യക്തമാക്കി. മുപ്പത്തിയാറുകാരനായ റോഞ്ചി 2013ലാണ് ന്യൂസീലൻഡിനായി അരങ്ങേറ്റം കുറിച്ചത്. നാല് ടെസ്റ്റുകളിലും 67 ഏകദിനങ്ങളിലും 32 ടിട്വന്റിയിലും റോഞ്ചി കിവീസിനായി കളിച്ചിട്ടുണ്ട്. 2015 ലോകകപ്പ് ഫൈനൽ വരെയത്തിയ ന്യൂസീലൻഡ് ടീമിൽ അംഗമായിരുന്നു റോഞ്ചി. വെടിക്കെട്ട് ബാറ്റ്സ്മാനായി വിലയിരുത്തപ്പെടുന്ന കിവീസ് താരം കഴിഞ്ഞ ചാമ്പ്യൻസ് ട്രോഫിയിൽ ഓസീസിനെതിരായ മത്സരത്തിൽ 43 പന്തിൽ നിന്ന് 65 റൺസ് അടിച്ചിരുന്നു. 2014-15ൽ ഡുനെഡിനിൽ ശ്രീലങ്കക്കെതിരെ 99 പന്തിൽ പുറത്താകാതെ 170 റൺസ് നേടിയത് റോഞ്ചിയുടെ മറ്റൊരു വെടിക്കെട്ട് പ്രകടനമാണ്. അന്താരാഷ്ട്ര ക്രിക്കറ്റിൽ ഓസ്ട്രേലിയക്ക് വേണ്ടിയാണ് ലൂക്ക് റോഞ്ചി അരങ്ങേറ്റം കുറിച്ചത്. 2008-2009 വർഷങ്ങളിൽ ഓസീസിനായി നാല് ഏകദിനങ്ങളും മൂന്ന് ടിട്വന്റിയും റോഞ്ചി കളിച്ചിട്ടുണ്ട്. പിന്നീട് സ്വദേശമായ ന്യൂസീലൻഡിലേക്ക് റോഞ്ചി തിരിച്ചുവരികയായിരുന്നു. അന്താരാഷ്ട്ര ക്രിക്കറ്റിൽ നിന്ന് വിരമിച്ചെങ്കിലും ആഭ്യന്തര മത്സരങ്ങളിൽ കളിക്കുമെന്ന് റോഞ്ചി വ്യക്തമാക്കി. നാറ്റ് വെസ്റ്റ് ടിട്വന്റിയിൽ ലെയ്സെസ്റ്റർഷെയറിന് വേണ്ടി റോഞ്ചി ഗ്രൗണ്ടിലിറങ്ങും.
ഭോപ്പാൽ: ചാമ്പ്യൻസ് ട്രോഫി ഫൈനലിൽ പാകിസ്താന്റെ വിജയം ആഘോഷിച്ച 15 പേരെ അറസ്റ്റ് ചെയ്ത് മൂന്ന് ദിവസങ്ങൾക്ക് ശേഷം ഇവർക്കെതിരെ ചുമത്തിയ രാജ്യ ദ്രോഹ കുറ്റം മധ്യപ്രദേശ് പോലീസ് പിൻവലിച്ചു. രാജ്യദ്രോഹ കുറ്റം പിൻവലിച്ച് യുവാക്കൾക്കെതിരെസാമുദായിക സൗഹാർദ്ദത്തിന് തടസ്സം സൃഷ്ടിച്ചതിന് കേസെടുത്തു. ഐപിസി 153എ പ്രകാരമാണ് കേസെടുത്തത്.രാജ്യദ്രോഹക്കുറ്റം തെളിയിക്കാൻ ബുദ്ധിമുട്ടാണെന്നകാരണത്താലാണ് 153എ പ്രകാരം കേസെടുത്തതെന്ന് ബുർഹാൻപുർ പോലീസ് വ്യക്തമാക്കി. ഇതിൽ ഒരാൾ പോലും മുമ്പ് കുറ്റകൃത്യങ്ങളിൽ പങ്കാളികളാവാത്തതും കേസ് പിൻവലിക്കാൻകാരണമായെന്ന് പോലീസ് പറയുന്നു.എന്നാൽ ഇവർക്കെതിരെ ചുമത്തിയ ഗൂഡാലോചന കുറ്റം നിലനിൽക്കും. ഞായറാഴ്ച നടന്ന ചാമ്പ്യൻസ് ട്രോഫി ഫൈനലിൽ ഇന്ത്യയെ 180 റൺസിന് പരാജയപ്പെടുത്തി പാകിസ്താൻ ചാമ്പ്യൻസ് ട്രോഫി നേടിയതാണ് സംഭവങ്ങൾക്കാധാരം. ചിലർ പാകിസ്താന് അനുകൂലമായി മുദ്രാവാക്യങ്ങൾ വിളിക്കുകയും പടക്കം പൊട്ടിക്കുകയും ചെയ്തതായി പോലീസ് ആരോപണം ഉന്നയിച്ചിരുന്നു. തുടർന്ന്15 പേർക്കെതിരെ കുറ്റകരമായ ഗൂഡാലോചന, രാജ്യദ്രോഹം തുടങ്ങിയ കുറ്റങ്ങൾക്ക് ഷാഹ്പുർ പോലീസ് കേസെടുക്കുകയായിരുന്നു. മധ്യപ്രദേശിലെ ബുർഹാൻപുർ ജില്ലയിലെ മൊഹാദിൽ തിങ്കളാഴ്ച വൈകിട്ടാണ് ഇവരെ അറസ്റ്റ് ചെയ്യുന്നത്. പിന്നീട് ഇവരെ കോടതിയിൽ ഹാജരാക്കി.
തിരുവനന്തപുരം: ഭൂമിയുടെ കരം സ്വീകരിക്കാൻ വില്ലേജ് അധികൃതർ വിസമ്മതിച്ചതിനെ തുടർന്ന് ചെമ്പനോട് വില്ലേജോഫീസിൽ കർഷകനായ ജോയി ജീവനൊടുക്കിയ സംഭവത്തിൽ കുറ്റക്കാരായ ഉദ്യേഗസ്ഥർക്കെതിരെ നരഹത്യക്ക് കേസെടുക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. ജോയിയുടെ കുടംബത്തിന് നഷ്ടപരിഹാരം നൽകണമെന്നും അദ്ദേഹം സർക്കാരിനോടാവശ്യപ്പെട്ടു. വില്ലേജ് അസിസ്റ്റന്റിനെ സസ്പൻഡ് ചെയ്ത് കൊണ്ട് മാത്രം തീരുന്ന പ്രശ്നമല്ല ഇത്. കൈക്കൂലി നൽകാത്തതിനെ തുടർന്ന് കഴിഞ്ഞ ഒന്നര വർഷമായി വില്ലേജ് അധികൃതർ ജോയിയെ നിരന്തരം ബുദ്ധിമുട്ടിക്കുകയായിരുന്നു. പലതവണ കയറി ഇറങ്ങിയിട്ടും ഭൂ നികുതി സ്വീകരിക്കുന്ന കാര്യത്തിൽ വില്ലേജ് അധികൃതർ കുറ്റകരമായ അനാസ്ഥ കാണിക്കുകയായിരുന്നു. ഇതിൽ മനം നൊന്താണ് ജോയി ജീവനൊടുക്കിയത്. ഭൂ നികുതി സ്വീകരിക്കാതിരുന്നത് മൂലം ജോയിയും കുടംബവും വില്ലേജ് ഓഫീസിൽ സത്യാഗ്രഹം ഇരിക്കുന്ന അവസ്ഥവരെയുണ്ടായി. തഹസിൽദാർ ഇടപെട്ട് നികുതി സ്വീകരിക്കണമെന്ന് വില്ലേജ് അധികൃതർക്ക് നിർദേശം നൽകിയിട്ടും അതനുസരിക്കാൻ അവർ തയ്യാറാകാതിരുന്നതാണ് ജോയിയുടെ ആത്മഹത്യയിലേക്ക് നയിച്ചത്. ആയിരക്കണക്കിന് ജനങ്ങളാണ് ദിവസേന വില്ലേജ് ഓഫീസ് പോലുള്ള സർക്കാർ സ്ഥാപനങ്ങളുമായി ബന്ധപ്പെടുന്നത്. പലപ്പോഴും ജനങ്ങളെ നിരാശരാക്കുന്ന നിലപാടുകളാണ് ഉദ്യേഗസ്ഥർ കൈക്കൊളളുന്നത്. സമയ ബന്ധിതമായി സേവനങ്ങൾ ജനങ്ങൾക്ക് നൽകാൻ ഉദ്യേഗസ്ഥർ ശ്രദ്ധചെലുത്തിയില്ലങ്കിൽ ഇത്തരം ദുരന്തങ്ങൾ ആവർത്തിക്കപ്പെടുമെന്നും രമേശ് ചെന്നിത്തല വ്യക്തമാക്കി. കുറ്റക്കാരായ ഉദ്യേഗസ്ഥർക്കെതിരെ സർക്കാർ കർശന നടപടികൾ കൈക്കൊണ്ടില്ലങ്കിൽ ജനങ്ങൾക്ക് സർക്കാർ സംവിധാനങ്ങളിലുള്ള വിശ്വാസം പൂർണ്ണമായും നഷ്ടപ്പെടുമെന്നും രമേശ് ചെന്നിത്തല പ്രസ്താവനയിൽ പറഞ്ഞു.
തിരുവനന്തപുരം: സ്വാമി ഗംഗേശാനന്ദയുടെ ജനനേന്ദ്രിയം മുറിച്ച കേസിൽ സി.ബി.ഐ അന്വേഷണം ആവശ്യപ്പെട്ട് കൊണ്ടുള്ള യുവതിയുടെ ഹർജി തിരുവനന്തപുരം പോക്സോ കോടതി തള്ളി. യാതൊരു നിയമസാധുതയും പരിശോധിക്കാതെ അനാവശ്യ ഹർജി നൽകുന്നത് കോടതിയുടെ സമയം കളയലാണെന്ന് ചൂണ്ടിക്കാട്ടി യുവതിക്കെതിരെ രൂക്ഷ വിമർശനവും കോടതി നടത്തി. യുവതിയുടെ ഹർജിയിലെ ആവശ്യം കോടതിയുടെ അധികാര പരിധിയിൽ അല്ലെന്ന് പ്രോസിക്യൂഷൻ വാദിച്ചു. ഈ വാദം അംഗീകരിച്ചാണ് ഹർജി നിലനിൽക്കില്ലെന്ന് കോടതി അറിയിച്ചത്. വാദം കേൾക്കാനായി യുവതി കോടതിയിൽ നേരിട്ട് ഹാജരായിരുന്നു. ഇപ്പോഴുള്ള കേസന്വേഷണത്തിൽ വിശ്വാസമില്ലെന്നും കേസന്വേഷണം അട്ടിമറിക്കുന്നുവെന്നും അരോപിച്ചായിരുന്നു പരാതിക്കാരിയായ യുവതി കോടതിയെ സമീപിച്ചത്.
കണ്ണൂർ: അച്ചടക്കത്തിന്റെ അതിർവരമ്പുള്ളതിനാൽ ആക്ഷേപങ്ങൾക്ക് പരസ്യമായി മറുപടി പറയാൻ കഴിയില്ല എന്ന് കണ്ട് പോലീസിനെ കെട്ടിയിട്ട് അടിക്കാമെന്ന് കരുതേണ്ടെന്ന് ഫസൽ വധക്കേസ് അന്വേഷണം പരാമർശിച്ച് കണ്ണൂർ ഡിവൈഎസ്പി പി. പി സദാനന്ദൻ. ഫസൽ വധക്കേസിലെ സത്യാവസ്ഥ ഇന്നല്ലെങ്കിൽ നാളെ ബോധ്യപ്പെടും. കേസ് അന്വേഷണത്തെക്കുറിച്ച് പോലീസുകാർക്കെതിരെ ഒരു പ്രത്യേക പാർട്ടിക്കാർ കൊലവിളി നടത്തിക്കൊണ്ട് ചാനലുകളിൽ അധിക്ഷേപം നടത്തുമ്പോൾ അതിന് ആര് മറുപടി പറയും. പോലീസിന് അച്ചടക്കത്തിന്റെ അതിർവരമ്പിനുള്ളിൽ നിന്നുകൊണ്ടേ എന്തെങ്കിലും പറയാൻ കഴിയൂ, പറയാൻ സാധിക്കാത്തവരെ കെട്ടിയിട്ട് അടിക്കാം എന്ന് കരുതരുത്. ഫസൽ വധക്കേസിൽ നിലവിലുള്ള പ്രതികളല്ല അത് ചെയ്തിട്ടുള്ളത് എന്ന് പറഞ്ഞത് ഞാനാണോ, ഹൈക്കോടതിയാണ് അത് പറഞ്ഞതെന്നും പി പി സദാനന്ദൻ പറഞ്ഞു. കണ്ണൂർ ജില്ലാ പോലീസ് അസോസിയേഷൻ സമ്മേളനത്തിൽ സംസാരിക്കവേയാണ് അദ്ദേഹം ഇക്കാര്യങ്ങൾ തുറന്നുപറഞ്ഞത്. വളരെ മോശം ഭൂതകാലമുള്ള മൂന്നു വ്യക്തികൾ ആ പ്രദേശത്തുണ്ട് എന്ന ഒറ്റക്കാരണം കൊണ്ട്, പോലീസിന് വളരെ എളുപ്പം അവരെ പിടിച്ച് അങ്ങ് പ്രതിയാക്കാൻ സാധിച്ചു. ഈ പ്രതികളെ ഒന്ന് സ്പർശിക്കാനുള്ള തെളിവ് പോലും ഇല്ല എന്ന് ഹൈക്കോടതി അന്നേ പറഞ്ഞതാണ്. സംഭവം നടന്ന് ഒരു വർഷം തികയുമ്പോൾ ഒരു തിയേറ്ററിന്റെ തുറസ്സായ സ്ഥലത്ത് നിന്ന് കുറേ ആയുധങ്ങൾ എടുത്തുകൊണ്ട് വന്ന് കൃത്യത്തിന് ഉപയോഗിച്ചതാണെന്ന് പറഞ്ഞാൽ വിശ്വസിക്കാൻ കഴിയില്ല എന്ന ഹൈക്കോടതി പറഞ്ഞു. അറസ്റ്റിലേക്ക് നയിച്ച സാക്ഷിമൊഴികളെല്ലാം മരിച്ചയാളുടെ സംഘടനയുമായി ബന്ധപ്പെട്ടവരാണ് അത് വിശ്വസനീയമല്ല എന്ന് അന്വേഷണ ഉദ്യോഗസ്ഥൻ തന്നെ സത്യവാങ്മൂലംഫയൽ ചെയ്തിരുന്നതാണ്-ഡിവൈഎസ്പി പറഞ്ഞു. പ്രതികളെ ശിക്ഷിക്കാനുള്ള തെളിവില്ല എന്ന് പറയരുത് എന്നാൽ തൂക്കിലേറ്റാനുള്ള തെളിവൊന്നുമില്ല എന്നും അദ്ദേഹം പറഞ്ഞു ഫസൽ വധക്കേസ് അട്ടിമറിക്കാൻ കൂട്ടുനിൽക്കുന്നുവെന്ന് ആരോപിച്ച് കണ്ണൂർ ഡിവൈഎസ്പിയായ പി.പി സദാനന്ദനും തലശ്ശേരി ഡിവൈഎസ്പിയായ പ്രിൻസ് ഏബ്രഹാമിനുമെതിരെ ബിജെപി രൂക്ഷമായ വിമർശനം അഴിച്ചുവിട്ട പശ്ചാത്തലത്തിലാണ് അദ്ദേഹത്തിന്റെ ഈ പ്രതികരണങ്ങൾ. ഫസൽ വധക്കേസിൽ പ്രതികളായ കാരായി രാജനേയും കാരായി ചന്ദ്രശേഖരനേയും രക്ഷിക്കാൻ ഡിവൈഎസ്പിമാർ ശ്രമിക്കുന്നുവെന്നായിരുന്നു ബിജെപിയുടെ പ്രധാന വിമർശനം. പുതിയ വെളിപ്പെടുത്തലിന്റെ പശ്ചാത്തലത്തിൽ കേസിൽ തുടരന്വേഷണം എന്ന ആവശ്യം കോടതി തള്ളുകയായിരുന്നു. കോടതിയുടെ പരിഗണനയിലിരിക്കുന്ന കേസിൽ ഡിവൈഎസ്പി നടത്തിയ ഈ പരാമർശങ്ങൾ വിവാദമാകാൻ സാധ്യതയേറെയാണ്.
താനെ: വിമാനയാത്രയ്ക്കിടയിലെ പ്രസവം വാർത്തയായി ദിവസങ്ങൾ പിന്നിടും മുമ്പ് റെയിൽവേസ്റ്റേഷനിൽ യുവതിയുടെ സുഖപ്രസവം. പ്രസവമെടുത്തതാവട്ടെ ആർപിഎഫ് കോൺസ്റ്റബിളും. മഹാരാഷ്ട്രയിലെ താനെ സ്റ്റേഷനിലാണ് സംഭവം. പൂർണ്ണ ഗർഭിണിയായ മീനാക്ഷി ജാധവ് ഭർത്താവായ സന്ദേശ് ജാധവിനൊപ്പമാണ് റയിൽവേ സ്റ്റേഷനിലെ പത്താമത്തെ പ്ലാറ്റ്ഫോമിലെത്തുന്നത്. ആശുപത്രിയിൽ ചെന്ന് ഡോക്ടറെ കാണാൻ ഘാട്കോപറിലേക്കുള്ള ടിക്കറ്റെടുത്ത് പ്ലാറ്റ്ഫോമിൽ കാത്ത് നിൽക്കുകയായിരുന്നു യുവതിയും ഭർത്താവും. വേദന തീവ്രമായതോടെ യാത്രക്കാരിയായ ഒരു നഴ്സും കോൺസ്റ്റബിളായശോഭാമോട്ടെയും യുവതിയുടെ സഹായത്തിനെത്തുകയായിരുന്നു. യുവതിയുടെ നിലവിളി കേട്ടാണ് പ്ലാറ്റ്ഫോമിലേക്ക് ശോഭ മോട്ടെ ഓടിയെത്തുത്തന്നത്. ഉടൻ തന്നെ പുതപ്പുപയോഗിച്ച് മറച്ച് പ്ലാറ്റ്ഫോമിൽ തന്നെപ്രസവിക്കാനുള്ള സൗകര്യം ഇവർ സജ്ജമാക്കി.സഹായത്തിനായി യാത്രക്കാരിയായ നഴ്സുമെത്തി. ഇരുവരും സഹായത്തിനെത്തി അധികം താമസിയാതെ തന്നെ പ്രസവം നടന്നു. ഇതിനു മുമ്പ് ഛത്രപതി ശിവജി ടെർമിനലിലും മറ്റൊരു യുവതിയുടെ പ്രസവം ശോഭമോട്ടെ എടുത്തിരുന്നുവെന്നാണ് റിപ്പോർട്ടുകൾ. A lady passenger delivered a baby boy at PF10 of Thane stn with timely assistance of RPF LHC Shobha Mote & passenger nurse. @sureshpprabhu pic.twitter.com/870mGMgoxw — Central Railway (@Central_Railway) June 21, 2017
കൊച്ചി: എഡിജിപി ടോമിൻ തച്ചങ്കരിക്കെതിരായ ഹർജിയിൽ സർക്കാർ സത്യവാങ്മൂലം സമർപ്പിക്കാത്തതിൽ ഹൈക്കോടതിക്ക് അതൃപ്തി. തച്ചങ്കരിക്കെതിരെ വകുപ്പ് തല നടപടികളുണ്ടായിട്ടുണ്ടെങ്കിൽ അതിന്റെ വിശദാംശങ്ങളും അന്വേഷണ ഘട്ടത്തിൽ ഇരിക്കുന്നതായ കേസ് വിവരങ്ങളും കുറ്റപത്രം സമർപ്പിച്ചിട്ടുണ്ടെങ്കിൽ അതും ഉൾപ്പടെയുള്ള വിവരങ്ങൾ ഉൾപ്പെടുത്തി സത്യവാങ്മൂലം നൽകാനാണ് ആവശ്യപ്പെട്ടിരിക്കുന്നത്. എന്തുകൊണ്ടാണ് സത്യവാങ്മൂലം നൽകാൻ സർക്കാർ വൈകുന്നതെന്ന് ഡിവിഷൻ ബഞ്ച് ചോദിച്ചു. ഇന്ന് കേസ് പരിഗണിച്ചപ്പോൾ സത്യവാങ്മൂലം സമർപ്പിക്കാൻ സർക്കാർ 10 ദിവസത്തെ സാവകാശം തേടിയതാണ് കോടതിയുടെ അതൃപ്തിക്ക് ഇടായക്കിയത്. ജൂൺ 28 ന് കേസ് പരിഗണിക്കുമ്പോൾ സത്യവാങ്മൂലം സമർപ്പിച്ചിരിക്കണമെന്ന് കോടതി നിർദേശം നൽകി. നിരവധി ആരോപണങ്ങളാണ് തച്ചങ്കരിക്കെതിരെയുള്ളത്, അങ്ങനെയൊരാളെ എന്തിന് സുപ്രധാന പദവിയിൽ നിയമിച്ചു, സെൻകുമാർ വിരമിക്കാൻ കാത്തുനിൽക്കുകയാണോ സർക്കാരെന്നും കോടതി ചോദിച്ചു. രാമങ്കരി സ്വദേശി ജോസ് തോമസാണ് തച്ചങ്കരിയെ പോലീസ് ആസ്ഥാനത്ത് നിയമിച്ചത് ചോദ്യം ചെയ്ത് പൊതുതാത്പര്യ ഹർജി സമർപ്പിച്ചത്. സുപ്രീംകോടതി നിർദേശത്തെ തുടർന്ന് സെൻകുമാറിനെ വീണ്ടും പോലീസ് മേധാവിയായി നിയമിക്കുന്നതിന് രണ്ട് ദിവസം മുമ്പാണ് സർക്കാർ തച്ചങ്കരിയെ പോലീസ് ആസ്ഥാനത്ത് നിയമിച്ചത്. കൈക്കൂലി വാങ്ങിയെന്ന ആരോപണത്തിൽ തച്ചങ്കരിയെ സസ്പെൻഡ് ചെയ്യണമെന്ന വിജിലൻസ് ഡയറക്ടറുടെ ശുപാർശയിൽ നടപടി വേണമെന്നും ഹർജിയിൽ ആവശ്യപ്പെട്ടിട്ടുണ്ട്.
മേട്ടുപ്പാളയം: രണ്ട് ദിവസമായി ഭവാനിസാഗർ അണകെട്ടിന്റെ ജലസംഭരണ മേഖലയിൽ അവശനിലയിൽ കണ്ടെത്തിയ പിടിയാന ചരിഞ്ഞു. ഏകദേശം 45 വയസ്സ് പ്രായമുള്ള ആന വെള്ളംകുടിക്കാൻ എത്തിയപ്പോൾ മയങ്ങിവീഴുകയായിരുന്നു. ഇക്കഴിഞ്ഞ 20നാണ് പതിവ് റോന്തിനിടെ വനപാലകർ ആനയെ കണ്ടെത്തിയത്. ഉടൻ തന്നെ വനംവകുപ്പിലെ മൃഗഡോക്ടർ മനോഹരനെത്തി ചികിത്സ നൽകിയിരുന്നു. വയറിളക്കം പിടിപ്പെട്ട ആനയ്ക്ക് വെയിൽ കൊള്ളിക്കാതെ തണലൊരുക്കിയ ശേഷം നിർജലീനീകരണത്തിനുള്ള ചികിത്സ നൽകി. ഗ്ലുക്കോസും ആന്റിബയോട്ടിക്കുകളും ഭക്ഷണവും നൽകി ബുധനാഴ്ച വരെ ശുശ്രൂഷ തുടർന്നതോടെ എണീക്കാൻ ശ്രമിച്ച ആനയെ ജെസിബി ഉപയോഗിച്ച് എഴുന്നെൽപ്പിച്ചശേഷം കാട്ടിലേക്ക് പറഞ്ഞയച്ച് വനപാലകർ നീരീക്ഷണം നടത്തിയിരുന്നു. ഇതിനിടെയാണ് ആനകൂട്ടത്തോടൊപ്പം ചേർന്ന പിടിയാന വ്യാഴാഴ്ച രാവിലെ ഭവാനിപ്പുഴയുടെ പെത്തികുട്ടബീറ്റിലെ വനഭാഗത്ത് വെള്ളകുടിക്കാൻ എത്തിയത്. പുഴയിൽ ഇറങ്ങിയ ആന തളർന്ന് വീഴുകയായിരുന്നു. മറ്റുള്ള ആനകൾ ചേർന്ന് എഴുന്നേൽപ്പിക്കാനുള്ള ശ്രമം വിഫലമായതോടെ 11മണിയോടെ ചെരിഞ്ഞു. ബുധനാഴ്ച വൈകീട്ടോടെ പോസ്റ്റ്മോർട്ടം ചെയ്തശേഷം പുഴക്കരയിൽതന്നെ ജഡം കത്തിക്കാനാണ് തീരുമാനം.
കോഴിക്കോട്: കൈവശഭൂമിക്ക് നികുതി സ്വീകരിക്കാൻ വില്ലേജ് അധികൃതർ തയ്യാറാകാത്തതിൽ മനം നൊന്ത് ചെമ്പനോടയിലെ കർഷകൻ ജോയി ആത്മഹത്യ ചെയ്ത സംഭവത്തിൽ വില്ലേജ് അസിസ്റ്റന്റിന് പുറമെ വില്ലേജ് ഓഫീസറെയും ജില്ലാ കലക്ടർ സസ്പെൻഡ് ചെയ്തു. ചെമ്പനോട വില്ലേജ് ഓഫീസർ സണ്ണിയെയാണ് സസ്പെൻഡ് ചെയ്തത്. സംഭവവുമായി ബന്ധപ്പെട്ട് റവന്യു മന്ത്രി ഇ ചന്ദ്രശേഖരൻ കലക്ടറോട് റിപ്പോർട്ട് സമർപ്പിക്കാൻ ആവശ്യപ്പെട്ട സാഹചര്യത്തിൽ വില്ലേജ് ഓഫീസറോട് അടിയന്തരമായി വിശദീകരണം നൽകാൻ കളക്ടർ ഉത്തരവിട്ടിരുന്നു. എന്നാൽ വിശദീകരണം തൃപ്തികരമല്ലാത്ത സാഹചര്യത്തിലാണ് വില്ലേജ് ഓഫീസറെയും സസ്പെൻഡ് ചെയ്തത്. വില്ലേജ് അസിസ്റ്റന്റ് സിലീഷിനെയായിരുന്നു ജില്ലാ കാലക്ടർ ആദ്യം സസ്പെൻഡ് ചെയ്തത്. ചെമ്പനോടതാഴത്ത് അങ്ങാടിയിലുള്ള വില്ലേജ് ഓഫീസ് കെട്ടിടത്തിൽ ബുധനാഴ്ചയായിരന്നു ജോയി തൂങ്ങി മരിച്ചത്. ജില്ലാ കളക്ടർ നേരിട്ടെത്തി കുറ്റക്കാർക്കെതിരെ നടപടിയെടുക്കുകയും നികുതി അടയ്ക്കാൻ അവസരമൊരുക്കുകയും ചെയ്യാതെ മൃതശരീരം നീക്കാൻ അനുവദിക്കില്ലെന്ന നിലപാടിലായിരുന്നു നാട്ടുകാർ. കലക്ടറുടെ സന്ദർശന വേളയിൽ കുറ്റക്കാർക്കെതിരെ നടപടിയെടുക്കുമെന്നും നികുതി സ്വീകരിക്കുന്നത് സംബന്ധിച്ച് ഒരാഴ്ചക്കകം തീരുമാനമെടുക്കുമെന്നായിരുന്നുകളക്ടർ അറിയിച്ചത്.എന്നാൽ നാട്ടുകാർ പ്രതിഷേധവുമായെത്തിയതോടെ വില്ലേജ് അസിസ്റ്റന്റിനെ ഇന്നു തന്നെ സസ്പെൻഡ് ചെയ്യുമെന്നും നികുതി സ്വീകരിക്കാൻ ഇന്ന് തന്നെ അവസരമൊരുക്കുമെന്നും കളക്ടർ പ്രഖ്യാപിക്കുകയായിരുന്നു. ആരോപണ വിധേയരായ ഉദ്യോഗസ്ഥർ നേരത്തെയും ഇത്തരത്തിൽ പെരുമാറിയതായി നാട്ടുകാർ കളക്ടറോട് പരാതി അറിയിച്ചു. ഇവിടെയുള്ള ഉദ്യോഗസ്ഥർ കൈക്കൂലിയടക്കം ആവശ്യപ്പെട്ടതായും നാട്ടുകാർ കളക്ടറെ അറിയിച്ചു. പരാതി ലഭിച്ചാൽ ഇത്തരം ഉദ്യോഗസ്ഥർ സർവീസിലുണ്ടാകില്ലെന്നും വില്ലേജ് ഓഫീസിലെ പ്രശ്നങ്ങൾ ഈ സംഭവത്തിന് ശേഷമാണ് താനറിഞ്ഞതെന്നും കളക്ടർ പറഞ്ഞു.
തിരുവനന്തപുരം: വിവിധ സേവനങ്ങൾക്കായി വില്ലേജ് ഓഫീസിൽ എത്തുന്നവരെ നടത്തി വലയ്ക്കുന്ന ഉദ്യോഗസ്ഥർക്കെതിരെ കർശന നടപടിയെടുക്കുമെന്ന് റവന്യൂമന്ത്രി ഇ. ചന്ദ്രശേഖരൻ. സേവനങ്ങൾക്കായി രണ്ട് തവണയിൽ അധികം ജനങ്ങളെ ഓഫീസിലേക്ക് എത്തിക്കരുത്. അങ്ങനെയെങ്കിൽ ഇതിന്റെ കാരണം രേഖാമൂലം അയാൾക്ക് എഴുതി നൽകണമെന്നും റവന്യൂമന്ത്രി നിർദേശിച്ചു. കോഴിക്കോട് ചെമ്പനോടയിൽ കരമടച്ചു നൽകുന്നതിൽ വീഴ്ച വരുത്തിയ ഉദ്യോഗസ്ഥ നടപടിയിൽ മനം നൊന്ത് കർഷകൻ ആത്മഹത്യ ചെയ്ത സംഭവത്തിന്റെ പശ്ചാത്തലത്തിലാണ് വില്ലേജ് ഓഫീസർക്കും തഹസിൽദാർക്കും കർശന നിർദേശം നൽകിയത്. ഇക്കാര്യം നിർദേശിച്ച് കൊണ്ട് വില്ലേജ് ഓഫീസർ, തഹസിൽദാർ എന്നിവർക്ക് സർക്കുലർ അയക്കാൻ ലാന്റ് റവന്യൂ കമ്മിഷണറോടും, ജില്ലാ കലക്ടർമാരോടും റവന്യമന്ത്രി നിർദേശിച്ചു. ജനങ്ങൾ ആവശ്യപ്പെടുന്ന സേവനം ലഭ്യമാക്കാൻ കഴിയുന്നില്ലെങ്കിൽ അവർക്ക് രേഖാമൂലം എഴുതി നൽകണം. ഇക്കാര്യം തഹസിൽദാർക്കും റിപ്പോർട്ട് ചെയ്യണം. കൂടാതെ വില്ലേജ് ഓഫീസിൽ നിന്നും സേവനം ലഭ്യമാകുന്നില്ലെങ്കിൽ തഹസിൽദാർക്ക് അപ്പീൽ നൽകാനുള്ള സൗകര്യം ഉണ്ടെന്ന് വരുന്നവരെ വില്ലേജ് ഓഫീസർ തന്നെ ബോധ്യപ്പെടുത്തണമെന്നും റവന്യൂമന്ത്രി നിർദേശിച്ചു. കഴിഞ്ഞ ദിവസമായിരുന്നു കോഴിക്കോട് ചെമ്പനോടയിൽ കൈവശഭൂമിക്ക് കരമടച്ച് കിട്ടാത്തതിൽ മനം നൊന്ത് വില്ലേജ് ഓഫീസിൽ കർഷകനായ ജോയ്തൂങ്ങിമരിച്ചത്. സംഭവവുമായി ബന്ധപ്പെട്ട് ചെമ്പനോട വില്ലേജ് ഓഫീസർ, അസിസ്റ്റന്റ് ഓഫീസർ എന്നിവരെ കലക്ടർ സസ്പെന്റ് ചെയ്തിരുന്നു.
കൊച്ചി: കാക്കനാട് ജില്ലാ ജയിലിൽ തടവുശിക്ഷ അനുഭവിച്ചുവരുന്ന പൾസർ സുനി, സഹതടവുകാരോട് നടിയെ ആക്രമിച്ച സംഭവത്തിനെ കുറിച്ചും അതിന്റെ പിന്നിൽ പ്രവർത്തിച്ചവരെ കുറിച്ചും പറഞ്ഞതായി സൂചന. സഹതടവുകാരിലൂടെ ഇക്കാര്യം അറിഞ്ഞ ജയിൽ അധികൃതർ, അന്വേഷണ ഉദ്യോഗസ്ഥരെ വിവരം അറിയിക്കുകയും അവർ ജയിലിൽ എത്തി സുനിയുടെ മൊഴിയെടുത്തതായും വിവരമുണ്ട്. നേരത്തെ സുനി പോലീസിനു നൽകിയ മൊഴിയിൽ ഇല്ലാതിരുന്ന സുപ്രധാന വിവരങ്ങൾ ലഭിച്ചുവെന്നാണ് വിവരം. കേസിൽ നേരത്തെ കുറ്റപത്രം സമർപ്പിച്ചിരുന്നുവെങ്കിലും കൂടുതൽ തെളിവുകൾ ലഭിച്ചാൽ തുടരന്വേഷണം നടത്തി കുറ്റപത്രം സമർപ്പിക്കാൻ സാധിക്കും. സുഹൃത്തുക്കളുടെ രഹസ്യമൊഴി മജിസ്ട്രേറ്റ് കോടതിയിൽ എത്തിച്ച് രേഖപ്പെടുത്തുന്നതും അന്വേഷണസംഘം ആലോചിക്കുന്നു. കഴിഞ്ഞ ഫെബ്രുവരിയിലാണ് കൊച്ചിയിൽ നടി കാറിൽവെച്ച് ആക്രമിക്കപ്പെട്ടത്.
കോഴിക്കോട്: യോഗ വെറും വ്യായാമ മുറയാണെന്ന മുഖ്യമന്ത്രിയുടെ പ്രസ്താവന ഭാരതീയ തത്വചിന്തകളേയും ഋഷീശ്വരൻമാരേയും അവഹേളിക്കുന്നതാണെന്ന് ബി.ജെ.പി സംസ്ഥാന അധ്യക്ഷൻ കുമ്മനം രാജശേഖരൻ. വേദസാരമായ ഉപനിഷത്തുകളിലും ഭഗവത്ഗീതയിലും യോഗയെപ്പറ്റി പരമാർശമുണ്ട്. യോഗ മതേതരമാണെന്ന മുഖ്യമന്ത്രിയുടെ പ്രസ്താവന ശാസ്ത്രീയ അറിവുകളുടെ അഭാവം മൂലം ഉണ്ടായതാണെന്നും കുമ്മനം തന്റെ ഫെയ്സ്ബുക്ക് പോസ്റ്റിൽ കുറിച്ചു. ഫെയ്സ്ബുക്ക് പോസ്റ്റിന്റെ പൂർണ രൂപം മുസ്ലീം രാഷ്ട്രത്തലവൻമാർ ഉൾപ്പടെയുള്ള ലോകനേതാക്കൾ ജനങ്ങൾക്കൊപ്പം യോഗ അഭ്യസിച്ച് അന്താരാഷ്ട്ര യോഗാദിനം ആചരിച്ചപ്പോൾ കേരള മുഖ്യമന്ത്രി മാത്രം പ്രസംഗം നടത്തി യോഗദിനം ആഘോഷിക്കുകയായിരുന്നു. യോഗ എന്നത് ചിത്തവൃത്തികളുടെ നിരോധമാണ്. ഇത് നടക്കുന്നതാകട്ടെ ആത്മീയതയുടെ അടിസ്ഥാനത്തിൽ മാത്രവും. ഇതിനായി പതഞ്ജലി മഹർഷി ആവിഷ്കരിച്ചതാണ് അഷ്ടാംഗയോഗം. യോഗം എന്ന പദ്ധതി പൂർണ്ണമാകണമെങ്കിൽ യമം, നിയമം, ആസനം, പ്രാണായാമം. പ്രത്യാഹാരം,ധാരണ, ധ്യാനം, സമാധി ഇവ ഒരുമിക്കണം. ഇത് വെറും വ്യായാമ മുറ കൊണ്ട് മാത്രം സാധിക്കില്ല. യോഗ മതവിരുദ്ധമോ മത നിഷേധമോ അല്ല. എല്ലാ മതസ്ഥരേയും സമന്വയിപ്പിക്കുന്ന ജീവിത പദ്ധതിയാണിത്. മതങ്ങൾ ഉണ്ടാകുന്നതിനും മുൻപ് യോഗ ഭാരതത്തിൽ പ്രചാരത്തിലുണ്ട്. മന്ത്രവും ബ്രഹ്മനാദവുമെല്ലാം പ്രാചീന ഋഷീശ്വരൻമാർ തപസ്സിലൂടെ ബോധ്യപ്പെട്ട് ചിട്ടപ്പെടുത്തിയ യോഗ വിധികളാണ്. അവയൊന്നും പാടില്ലെന്ന് നിഷ്കർഷിക്കുന്നത് പതഞ്ജലി മഹർഷിയെയും അതുവഴി യോഗയുടെ അന്തസ്സത്തയെ തന്നെയും ചോദ്യം ചെയ്യുന്നതാണ്. മന്ത്രം ചൊല്ലിയതിന്റെ പേരിലാണ് കഴിഞ്ഞ വർഷം ആരോഗ്യമന്ത്രി യോഗവേദി വിട്ടിറങ്ങിപ്പോയത്. മനുഷ്യരിൽ അന്തർലീനമായ ദിവ്യശക്തിയെ ഉയർത്തുന്ന യോഗമാർഗം ആധ്യാത്മികമായ പരിവർത്തനമാണുണ്ടാക്കുന്നതെന്ന് സ്വാമി വിവേകാനന്ദൻ വ്യക്തമാക്കിയിട്ടുണ്ട്. ഇപ്പോൾ മുഖ്യമന്ത്രി പിണറായി വിജയൻ യോഗയെ മതേതരമാക്കാൻ ശ്രമിക്കുന്നത് നിരീശ്വര -ഭൗതിക വാദങ്ങളുടെ തടവറയിൽ യോഗയെ തളച്ചിടാനാണ്. മതങ്ങൾ ഉണ്ടാകും മുൻപ് തന്നെ ലോകത്തിന് വ്യക്തമായ ദർശനവും കാഴ്ചപ്പാടും ഭാരതീയ ഋഷികൾ നൽകിയിട്ടുണ്ട്. അതിൽ ഒരു മാർഗ്ഗമാണ് യോഗ. ഇത് പാശ്ചാത്യർ അംഗീകരിച്ചിട്ടും ഋഷിപാര്യമ്പര്യത്തിന്റെ പിൻതലമുറക്കാരനായ പിണറായി വിജയനെ പോലുള്ളവർ മനസ്സിലാക്കാത്തത് ഖേദകരമാണ്. അന്താരാഷ്ട്ര യോഗാദിനത്തിന്റെ ഭാഗമായി ഐക്യരാഷ്ട്രസഭ ഓംകാരം സഹിതം പുറത്തിറക്കിയ തപാൽ സ്റ്റാമ്പ് ഈ പാരമ്പര്യത്തെ പൂർണ്ണമായും ആദരിക്കുന്നതാണ്.
 
 
Indias.com
Advertisement in Kerala.com, Kerala advertisements
Kerala.com
Kerala News, Kerala Tourism, Kerala Realestate, Kerala Matrimonials, Kerala Taxi
KeralaRealEstate.com
Sell / Buy properties, land, buildings, flats, houses, villas,commercial properties in kerala
Keralatravels.com
Kerala Tour Packages, Hotels, Resorts, Houseboats, Ayurveda, Taxi
Keralaevents.com
Event Management Kerala, Kerala Business Events, Kerala Upcoming Events
Keralataxi.com
Kerala Taxi, Kerala Tourism, Kerala Holidays, Tourist Cars, Cabs, Luxury vehicles
www.spoke.com
sales lead generation, US business
 
Hosted and Maintained by www.kerala.com & www.Indias.com www.Avoo.com by 
Worldviewer Dot Com (India) Pvt. Ltd.
 & Worldviewer.com Inc., USA
"Your Home, Your Town, Your World." Mail to:  info@kerala.com